“Duke përmirësuar cilësinë e menaxhimit të kohës, përmirësohen cilësitë e jetës”.
Brian Tracy
E pra, çfarëdolloj pune të bëni, çfarëdolloj aktiviteti të kryeni, është e rëndësishme të njihni mirë strategjitë për të menaxhuar sa më mirë kohën. Nëse nuk keni një mënyrë se si të menaxoni kohën tuaj, në përgjithësi gjërat që mund të ndodhin janë dy:
• Humbasni kohë gjithë ditën, duke u munduar të vendosni se çfarë të bëni më parë.
• Bëni një mori gjërash, por në fund të ditës keni ndjesinë se nuk keni bërë asgjë. E kështu ju duket se dita ka shkuar dëm.
Në këtë artikull duam të ndajmë me ju gjashtë sugjerime për të rritur produktivitetin tuaj ose më thjeshtë akoma, për të marrë sa më shumë nga ditët tuaja dhe nga jeta juaj në përgjithësi.
1. Evitoni listat e detyrave
Mënyra më e thjeshtë për t’u stresuar dhe për ta bërë jetën rrëmujë, është të bëni një listë të gjatë të gjërave që duhet të bëni. “To do list” ose lista e gjërave që duhen bërë, vetëm se ju streson e ju heq motivimin.
Një mënyrë me të vërtetë e dobishme për të organizuar ditën tuaj (dhe pse jo edhe jetën) është të bëni një listë të objektivave që doni të arrini.
Duke ndjekur këtë strategji, lista juaj nuk do të jetë e gjatë, gjërat që duhet të bëni do t’ju vijnë automatikisht vetë në mend dhe mund t’i bëni lehtësisht e pa asnjë sforco.
2. Caktoni afate
Nëse doni të arrini synimet tuaja sa më shpejt, duhet t’i caktoni vetes një datë skadence. Në të kundërt, do ta gjeni veten duke e shtyrë ditë pas dite afatin.
Me pak fjalë, në mënyrë të vullnetshme apo jo, do t’i jepni më pak rëndësi objektivave tuaja ose do të vonoheni shumë për t’i arritur ato, ose më keq akoma, nuk do t’i përmbushni fare ato. Vendosni një kohë të arsyeshme për çdo objektiv dhe premtojini vetes se do ta respektoni atë afat.
3. Mos bëni shumë punë njëherësh
Në vend që të bëni shumë gjëra njëkohësisht, planifikojeni ditën tuaj dhe ndajini ato çka duhet të bëni në afate kohore të mirëpërcaktuara.
Ose më thjeshtë, bëni çdo gjë me radhë. Është më mirë të bëni një punë, por ashtu siç duhet, se sa dhjetë të bëra përgjysmë.
Nëse punoni me kompjuter, evitoni të kontrolloni postën elektronike apo Facebook-un çdo dhjetë minuta. Posta elektronike mund të presë disa orë dhe miqtë tuaj do të jenë aty në Facebook kur të keni mbaruar punën.
4. Evitoni gjithçka që nuk ju shërben
Shpesh për krenari apo për ndjenjën e detyrës, bartim pas shumë gjëra të kota për të bërë, të cilat nuk ka asnjë kuptim të vazhdojmë t’i bëjmë.
Mësoni, mbi të gjitha t’u thoni jo njerëzve, mundësive apo projekteve, të cilat nuk janë të nevojshme ose që në këtë moment nuk jeni në gjendje t’i menaxhoni.
Nëse nuk e bëni këtë gjë, do t’ju rrëmbejnë kohën e çmuar për gjërat që kanë vërtetë rëndësi në jetën tuaj.
Por nëse keni bërë një premtim apo jeni përkushtuar në ndonjë mënyrë me dikë, një gjë shumë e mençur për t’u bërë është t’i kërkoni sinqerisht ndjesë personit në fjalë dhe të çliroheni nga ai detyrim, të cilin nuk mund ta menaxhoni apo që për çfarëdolloj arsyeje (e vlefshme ose jo) nuk ju pëlqen më që ta bëni.
5. Mësoni të delegoni
“I zoti e nxjerr gomarin nga balta”, thotë një fjalë e urtë. Po a është e drejtë kjo shprehje? Jo… Kush mendon kështu, me shumë gjasa nuk ia ka bërë asnjëherë vetes këtë pyetje: Sa vlen koha ime?
Në pjesën më të madhe të rasteve ngarkohemi me ankth dhe shpenzojmë mjaft kohë të çmuar duke u munduar të bëjmë gjithçka vetë, vetëm. Ndërkohë që mundemi fare mirë t’ia ngarkojmë dikujt tjetër si detyrë, duke kursyer kohë dhe shpesh edhe lekë. T’i delegojmë gjërat nuk është një shenjë dobësie, përkundrazi, është një gjë shumë e zgjuar.
Do të rrisni produktivitetin dhe do të mund t’i dedikoni pjesën më të madhe të kohës suaj gjërave që realisht kanë rëndësi për ju.
Përgatiti: Manjola EREQI
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
