Ka shumë njerëz që vuajnë nga lloje të ndryshme të pagjumësisë. Një problem që mund të shkaktojë lodhje kronike, ulje të vëmendjes dhe përqendrimit dhe nervozizëm. Problemi lind nga fakti se të gjitha këto simptoma mund të bëjnë një tendosje në trup dhe të ndërhyjnë në detyrat normale të përditshme. Dhe kur pagjumësia zgjat, ajo mund të ketë efekte të dëmshme për shëndetin.
Kohët e fundit, një hulumtim i kryer nga Universiteti i Padovës dhe Campania, botuar në revistën zyrtare të Shoqatës Evropiane të Kërkimit të Gjumit, “Journal of Sleep Research”, ka treguar se edhe karantina shkaktoi një ndryshim të madh në zakonet e jetës. Në fakt, studimi zbuloi se zvogëlimi i aktivitetit fizik, ekspozimi i pakët ndaj rrezeve të diellit, mungesa e aktiviteteve shoqërore, situata ekonomike, si dhe ndryshimi i jetës familjare çuan në përkeqësim të cilësisë së gjumit, një rritje të përdorimit të mediave dixhitale dhe një perceptim të shtrembëruar të kalimit të kohës.
Në përgjithësi, në periudhën e verës, ritmet rraskapitëse, nxehtësia, stresi, ankthi dhe një mënyrë jetese e pabalancuar mund të pengojnë që të bëni një gjumë të mirë.
Ndihmë nga ushqimi
“Një dietë e shëndetshme dhe e ekuilibruar, si dhe aktiviteti i rregullt fizik dhe përdorimi i teknikave antidepresive, ndihmojnë në krijimin e kushteve të duhura për një gjumë të mirë dhe të shëndetshëm”, shpjegon Dr. Marilù Mengoni, nutricioniste.
Çfarë të konsumoni dhe çfarë të pakësoni, ose më mirë të shmangni, në mënyrë që të pushoni mirë dhe të shmangni një natë pa gjumë?
7 këshilla të dobishme për ushqimin
– Mos hani mish (dhe të gjitha ushqimet me origjinë shtazore) për darkë.
– Shmangni kafen, çajin, çokollatën, sheqernat e thjeshtë dhe disa perime (patate, domate). Disa ushqime të pasura me solaninë si patëllxhani dhe specat mund të krijojnë pagjumësi tek njerëzit e ndjeshëm ndaj këtij alkaloidi.
– Shmangni ushqimet që përmbajnë jod si peshku, hudhra, kërpudhat, ananasi, rrushi, të cilat mund të çojnë në eksitim të sistemit nervor.
– Shmangni shijimin e vaktit të mbrëmjes me shumë erëza, me një veprim tonik, siç janë specat djegës ose piperi i zi.
– Nëse është e nevojshme, merrni melatonin. Disa elementë që janë në ushqim veprojnë si pararendësit e melatoninës: për shembull triptofani, i përfshirë në ushqime me origjinë bimore si drithërat dhe bishtajoret dhe në qumësht.
– Vakti i mbrëmjes duhet të jetë i lehtë, i përbërë nga perime të papërpunuara, drithëra dhe / ose bishtajore.
– Pini një çaj bimor para gjumit, me bazë livandon, ose lulet e pasionit. Një çaj i mirë kamomili është gjithashtu i dobishëm.
Rëndësia e stilit të jetës
Krahas këtyre këshillave të thjeshta, edhe masat paraprake të jetesës mund të bëjnë ndryshime. “Rregulli i parë është që të ndaloni përdorimin e pajisjeve elektronike si TV, telefon celular, tablet dhe kompjuter, 3 orë para se të shkoni në shtrat. Përpiquni gjithashtu të keni një temperaturë të rehatshme në dhomën e gjumit: nëse temperatura është shumë e lartë ose nëse ka burime drite, mund të vuani nga pagjumësia. Së fundmi, një banjë relaksuese në mbrëmje vonë mund t’ju ndihmojë të pushoni më mirë”, përfundon ekspertja.
Burimi / https://dilei.it/
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
