Me sytë nga një e ardhme më e gjelbër, më funksionale dhe më mikpritëse, Shqipëria po bën një hap të rëndësishëm drejt modernizimit të sektorit të turizmit dhe ndërtimit. Vizita e arkitektit të njohur italian Massimo Roj në Tiranë dhe takimi i tij me drejtuesit e “Hysenbelliu Group” shënon nisjen e një bashkëpunimi strategjik që premton të sjellë risi arkitektonike dhe standarde të reja cilësie në projektet turistike të vendit. Ky partneritet i nivelit të lartë, që bashkon përvojën ndërkombëtare me vizionin lokal, është një sinjal i qartë se Shqipëria po investon seriozisht në të ardhmen e saj si një destinacion turistik me identitet të fortë dhe infrastrukturë bashkëkohore.
Drejtues të “Hysenbelliu Group” zhvilluan në ambientet e kompanisë një takim me arkitektin e njohur italian Massimo Roj, themelues i studios së famshme Progetto CMR dhe një prej emrave më të spikatur të arkitekturës urbane në Evropë, i cili zhvilloi një vizitë 2-ditore në Tiranë.
Ky takim shënon fillimin e një bashkëpunimi strategjik në sektorët e ndërtimit dhe turizmit, me projekte që synojnë të sjellin një standard të ri dizajni dhe qëndrueshmërie në tregun shqiptar dhe evropian.
Massimo Roj, i cili rikthehet në Tiranë pas më shumë se një dekade, u prit nga drejtues të “Hysenbelliu Group” për të diskutuar projektet e përbashkëta që do të zhvillojnë në të ardhmen e afërt. Në qendër të bashkëpunimit janë projektimi i strukturave moderne e klasike, veçanërisht në fushën e hotelerisë dhe turizmit, të cilat do të ndërtohen në përputhje me filozofinë e arkitektit; një arkitekturë e qëndrueshme e funksionale që i përgjigjet nevojave të njerëzve dhe kohës.
Arkitekti Roj vlerësoi vizionin dhe gatishmërinë e “Hysenbelliu Group” për të investuar në projekte cilësore dhe inovative, duke e konsideruar këtë bashkëpunim si një hap konkret drejt një zhvillimi urban të qëndrueshëm dhe me identitet të qartë.
Massimo Roj është një nga figurat më të njohura të arkitekturës bashkëkohore në Itali dhe më gjerë. Ai ka themeluar në vitin 1994 Progetto CMR, një studio multidisiplinare që numëron mbi 300 profesionistë dhe ka realizuar më shumë se 4000 projekte në 12 shtete të ndryshme. Studioja është specializuar në dizajn të integruar, arkitekturë të qëndrueshme dhe zhvillim të hapësirave urbane inovative.
Bashkëpunimi i pritshëm midis “Hysenbelliu Group” dhe një emri kaq të njohur të arkitekturës ndërkombëtare konfirmon vizionin e grupit për të sjellë projekte me ndikim afatgjatë, që i japin Tiranës dhe Shqipërisë jo vetëm ndërtesa të reja, por vlera të qëndrueshme dhe përvoja autentike në turizëm e mikpritje.
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
