Aktiviteti i trurit është unik tek çdo individ dhe mund të krahasohet me gjurmët e tij të gishtave. Kur njeriu zgjohet nga gjumi, truri i tij arrin të prodhojë mjaftueshëm elektricitet sa të ndezë një llambë të vogël. Truri është organi me përmbajtjen më të madhe yndyrore, që arrin deri në 60%. Kjo është arsyeja përse një regjim ushqimor i pasur me acide yndyrore, siç janë omega-3 dhe omega-6 është thelbësor për shëndetin e trurit.
Përveç acideve yndyrore, truri ka nevoja të mëdha, të cilat plotësohen nëpërmjet barishteve dhe erëzave. Më poshtë po listojmë disa nga bimët dhe erëzat më të mira për trurin tuaj:
Trëndafili i egër
Kokrrat e trëndafilit të egër janë nga bimët medicinale me efektet më të fuqishme në organizmin e njeriut. Trëndafili i egër është një nga elementët që duhen përdorur në mekanizmat mbrojtës të trupit. Mund ta përdorni si çaj, duke shtypur 4-5 kokrra trëndafili të egër e t’i zieni në një gotë ujë.
Sherebela
Sherebela është një bimë mjekësore shumë e mirë për kujtesën. Studimet më të fundit mjekësore kanë konfirmuar se sherebela është e rëndësishme për shëndetin e njerëzve që vuajnë nga Alzheimeri.
Sherebelën mund ta konsumoni në formën e çajit, duke zierë në një filxhan çaji ujë 7-8 gjethe të freskëta sherebele ose 2 lugë çaji gjethe të thata. Nëse preferoni, mund ta ëmbëlsoni me mjaltë.
Bari i bletës
Sipas të dhënave, bari i bletës është një barishte shumë e mirë për përmirësimin e funksionit dhe aftësive të trurit. Ai rekomandohet edhe kundër ankthit dhe pagjumësisë.
Kanella
Kjo erz e superfuqishme përmban shumë anti-oksidantë. Ajo lufton inflamacionin dhe e bën njeriun më të vëmendshëm dhe vigjilent. Thjesht aroma e kanellës ka aftësi të përmirësojë funksionet e trurit. Ajo konsiderohet si një element i mirë në trajtimet kundër sklerozës. Mund ta përdorni në çaj.
Piperi i zi
Piperi i zi përmban piperinë, një substancë natyrale që përmirëson funksionin e trurit dhe zbut simptomat e depresionit.
Majdanozi dhe trumza
Këto barishte përmbajnë apigeninë, e cila është shumë e rëndësishme për formimin e neuroneve. Sipas studimeve, rekomandohet përfshirja e tyre si çaj në trajtimet kundër depresionit dhe Alzheimerit.
Rozmarina
Aroma e rozmarinës i jep shtysë pozitive trurit me një nuhatje të vetme. Acidi karnosik, që është përbërësi aktiv i rozmarinës e mbron trurin nga radikalet e lira dhe nga ishemia.
Burimi / gsh.al
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
