Studiuesit britanikë nga Universiteti i Exeter kanë treguar se njerëzit që jetojnë brenda një kilometri nga deti kanë shëndet më të mirë, janë më të lumtur dhe më të qetë. Ndër arsyet që fshihet pas kësaj është fakti që mjedisi detar ju bën që të kryeni më shumë aktivitet fizik, si shëtitje në plazh.
Deti është i mirë për shëndetin, si fizik ashtu edhe mendor: njerëzit që jetojnë pranë tij janë më të lumtur, më të qetë dhe gëzojnë mirëqenie më të madhe. Kjo u demonstrua nga një ekip hulumtues i Qendrës Evropiane për Mjedisin dhe Shëndetin e Njeriut, Gadishulli i Kolegjit të Mjekësisë dhe Stomatologjisë në Universitetin e Exeter, Britani e Madhe, i cili kreu një studim të thelluar mbi 48 milion britanikë.
Shkencëtarët, të koordinuar nga Dr. Benedict Wheeler, studiues i lartë në Shkollën e Mjekësisë të universitetit anglez, pasi mblodhi përgjigjet e një pyetësori në shkallë kombëtare, i ndau pjesëmarrësit sipas të dhënave për shëndetin, të cilat mund të ishin “të mira”, “mjaft mirë” ose “jo mirë”.
Duke kaluar këto të dhëna me ato të adresave të vendbanimit, doli në pah se ata që jetonin pranë detit kishin një shkallë më të lartë shëndetësore sesa ata që jetonin larg tij. Edhe pse nuk është shumë e theksuar, kjo diferencë e raportuar në një numër të madh ka një ndikim të rëndësishëm në sistemin shëndetësor të një vendi.
Por pse deti është i mirë për shëndetin? Para së gjithash studimi anglez, nuk është i parë që arrin në këtë përfundim dhe përvoja personale tregon që deti na bën të ndjehemi më të qetë. Jo rastësisht në një eksperiment në të cilin pjesëmarrësit duhet të zgjidhnin një peizazh natyror për shtëpinë e tyre – opsionet ishin mal, det ose fushë – më i votuari ishte ai me det. Sipas studiuesve britanikë, një nga arsyet kryesore është se ata që jetojnë pranë detit bëjnë shumë më shumë stërvitje gjatë vitit, siç janë ecja në plazh ose praktikimi i sporteve detare.
Duhet të shtohet gjithashtu përbërësi psikologjik i lidhur me ngjyrën, aromën, tingujt dhe flladin e lehtë të detit që përkëdhel fytyrën, gjithashtu nuk duhet harruar se ka shumë që plazhin e shohin si sinonim të argëtimit. E gjithë kjo nuk mund të bëjë gjë tjetër përveçse të kontribuojë në përmirësimin e shëndetit tonë fizik dhe mendor. Studiuesit po përpiqen të kuptojnë nëse disa nga përfitimet e jetës pranë detit mund të transferohen diku tjetër dhe nëse liqenet dhe lumenjtë dhurojnë të njëjtat efekte.
Burimi / https://scienze.fanpage.it
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
