Shmangia e dhimbjes së kokës është më e lehtë kur e kupton se si duhet ta parandalosh atë! Dhimbja e kokës është një nga problematikat më shqetësuese gjatë jetës së përditshme dhe një nga ankesat më të zakonshme mjekësore që mund të pengojë të jemi produktiv në punë, të jemi social apo të kemi një marrëdhënie të shëndetshme seksuale.
Numërohen rreth 150 lloje të dhimbjes së kokës, por kategoritë më të shpeshta janë: dhimbjet migrenoze, tensive dhe dhimbjet cluster. Nëse vuani nga dhimbja tensive, duhet të dini se, është dhimbje episodike që ndihet si një rreth përqark kokës e që mendohet se shkaktohet nga spazma e muskujve të qafës, shpatullave ose skalpit. Është dhimbje shtypëse ose djegëse dhe mund të zgjasë nga disa orë në disa ditë. Dy janë agravuesit kryesorë të saj: Stresi dhe postura e gabuar!
Msc. Andromeda Keci, Fizioterapiste
PROVONI TEKNIKA RELAKSIMI SI AUTOTERAPI
Shmangni stresin | Përpiquni që të filloni ditën me energji pozitive dhe duke mos sjellë në mendje kujtime dhe eksperienca negative. Kur të shtriheni në mbrëmje mbyllni sytë dhe përreth 10 minuta imagjinoni mbi gjërat që dëshironi më shumë sikur janë të bëra realitet, edhe nëse jeni të sëmurë imagjinoni që nuk keni asnjë simptomë të asaj sëmundjeje. Nëse e praktikoni në këtë mënyrë rreth 2 javë radhazi, do arrini jo vetëm të mposhtni dhimbjen e kokës, por edhe probleme të tjera shëndetësore të vërtetuara shkencërisht nga Dr.Joe Dispenza.
Msc. Joana Xhema, Fizioterapiste
Aplikimi i pakove të akullit ose të ngrohta | Aplikoni këto pako në pjesën e pasme të qafës për 10-15 minuta, por kujdes, nëse ndjeni marrje mendsh (vertigo) ndërprisni aplikimin e tyre.
Vendosni një shtroje| Shtrihuni në dysheme, mblidhni gjunjët në mënyrë që të keni kurrizin të relaksuar. Merrni dy topa tenisi, të cilët mund t’i bashkoni me një ngjitëse prej letre dhe vendosini në pjesën e pasme, ku ndahet koka me fillimin e qafës. Qëndroni 10-15 sekonda, bëni pauzë 5 sekonda dhe përsëriteni të njëjtin ushtrim në 3 sete. (Fig.1)
Në të njëjtën mënyrë si më sipër | Pasi keni vendosur topat e tenisit në pjesën e pasme, mendoni sikur keni një “kokërr ulliri” në pjesën e përparme të fytit (zonë e dalluar tek fyti i meshkujve më tepër/molla e Adamit e quajtur ndryshe) dhe bëni 10 lëvizje të ngadalta sikur doni ta shtypni këtë “kokërr ulliri”. Përsëriteni ushtrimin 3×10 lëvizje ulur ose shtrirë, pasi në këtë mënyrë mund të relaksoni spazmën e muskujve të pasëm të qafës si dhe të stimuloni muskujt e përparmë të qafës të forcohen, duke qenë se janë muskuj të dobësuar nga postura e gabuar që mund të mbani.
Këtë ushtrim duhet ta realizoni 4-5 herë në ditë edhe nëse punoni përpara kompjuterit, qëndroni në zyrë, qëndroni përpara Tv apo jeni duke qëndruar në trafik. (Fig.2)
Realizoni stretching të muskujve të kokës, qafës dhe shpatullave | Qëndroni në pozicion ulur në karrige, ku duhet të mbështetni vithet në fundin e mbështetëses: Bëni lëvizje të ngadalta duke afruar mjekrën drejt dërrasës së kraharorit.
- Nëse dëshironi të shtoni tërheqjen, vendosni dorën tuaj mbi kokë duke ushtruar një rezistencë shumë të lehtë, më pas rikthehuni sërisht në pozicionin fillestar me kokën në pozicionin drejt. (Fig.3)
- Në lëvizjen e radhës tentoni të afroni mjekrën tuaj në drejtim të supit të majtë/ djathtë më pas rikthehuni ngadalë në pozicion fillestar. Ushtrimin realizojeni për anën e djathtë dhe të majtë. Në mënyrë analoge në lëvizjen e radhës tentoni të afroni veshin tuaj tek supi dhe jo anasjellas. Ushtrimin realizojeni për anën tuaj të majtë dhe të djathtë. (Fig 4, 5)
- Një tjetër lëvizje është të afroni mjekrën tuaj dalëngadalë pranë gjoksit tuaj të majtë. Rezistencë mund të shtoni duke vendosur dorën mbi kokë e më pas riktheheni në pozicionin neutral me kokën e qafën drejt për ta përsëritur në anën e djathtë. Këto lëvizje mund t’i bëni minimalisht 1 herë në ditë deri në 3-4 herë në ditë, me 3 sete për 10-15 minuta. (Fig.6)
Botuar në Revistën “Psikologjia”, Nr. 146
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
