Besoj nuk i keni harruar batutat e famshme të komedisë më në zë të shkruar nga Teodor Laço. Ja një fragment i shkurtër:
Izmini: – Epo mirë moj bijë. Shko edhe ti e na sill ato japrakë!
Lajde: – Ua, ç’janë ato japrakë? Sot ju kemi ftuar ne!
Izmini: – Po se mos prishen, është vapë, sigurisht!
Por a e dini se ku ndodhet sot Izmini, personazhi i veprës së famshme të Teodor Laços në komedinë “Shi në plazh”? Natyrisht që ky ishte veç një karakter që përfaqësonte veprën, por aktorja e vërtetë, që i ka munguar skenës shqiptare, tjetërkund gjendet. Falë vëmendjes mediatike që emisioni “Pasdite në Top Channel” i ka kushtuar, kurioziteti për aktoren shqiptare na çon të mësojmë për jetën e saj tej kufijve. Ajo është Gjinovefa Redhi, e njohur si Vefi në qarqet e miqve të ngushtë. Jeton në Athinë, Greqi, ku jeton dhe punon gjithashtu si aktore. Me një karrierë të pasur që pas vitit ’97, ku iu desh të emigronte nga vendlindja e saj, Vlora, sot ajo ka një karrierë të pasur, pa lënë mënjanë dhe veprat shqiptare ku i është dashur të interpretojë me mjeshtëri. Në fund të vitit që lamë pas, Gjinovefa Redhi ka marrë titullin si “Femra e vitit 2015” në Greqi.
Rolet ku ka interpretuar Gjinovefa Redhi
Teatër:
“Shtëpia e Bernarda Albës” nga Federico Garcia Lorca; regjizor Gëzim Kame
“Mikroborgjezët” nga Maksim Gorki; regjisor Kadri Roshi
“Shi në plazh” nga Teodor Laço; regjisor Gëzim Kame
“Vizita e inspektorit” nga Nikolai Gogol; regjisor Birçe Hasko
“Familja e peshkatarit” nga Sulejman Pitarka; regjisor Timo Floko
“Kristali Blu” nga Mihallaq Qilleri; regjisor Besnik Aliaj
“Sakrifica” nga Ismail Kadare; regjisor Roland Minga
“Muri i heshtur” nga Paulo Messina; regjisor Roland Minga
“Tre Mendje në ankand” nga Ferdinand Hysi; regjisor Armando Bora
“Aziloidi” nga Ferdinand Hysi; regjisor Armando Bora
“SOS në Hotel” nga Ferdinand Hysi; regjisor Bujar Asqeriu
“Bankat” nga Gafur Shameti; regjisor Luftar Paja
Kinema:
“Në emër të lirisë” (1987), skenar: Bashkim Kozeli; regjisor Fehmi Hoshafi
“Bërtet hajduti” nga Dhimitër Psatha; regjisor Bujar Asqeriu
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
