E divorcuar, që kur solli në jetë djalin e saj, Orenin, gazetarja televizive Juli Xhokaxhi është përballur me të dyja rolet prindërore.
“Kur ka lindur Oreni ka qenë viti 1998. Kuptohet, në atë kohë, mund të merret me mend lehtë se si ishin kushtet. Kontakti i parë me Orenin më dha një ndjesi të jashtëzakoshme. Nuk ishte dashuri, pata një dhimbsuri të pafundme, një ndjesi që ajo krijesë aq e vogël me baluke me vijë në anë varej 100 për qind nga unë…”, tregon ajo në studion e Rudinës.
Juli rrëfen se përvoja si nënë ishte e vështirë, por së bashku me prindërit arriti ta kapërcente këtë vështirësi.
“Isha shumë e vogël, vetëm 22 vjeç. Ardhja e Orenit ishte një ndryshim 100 për qind për jetën time. Unë isha shumë e përkëdhelur nga familja ime. Jam vajzë e vetme me një vëlla dhe prindërit më kanë falur një dashuri të jashtëzakonshme. Por lindja e Orenit më dha një forcë të jashtëzakonshme. E kisha dëgjuar dhe e kam ndier që ditën e parë. Nuk ekzistonte më Juli. Në ҫdo moment të vështirë të jetës, nuk kam menduar ҫ’do ndodhë me mua, por ҫ’do të ndodhë me djalin. Mendoj se kjo është pjesë e ҫdo nëne, meraku i përhershëm për fëmijën.”
Tani që Oreni është një student 18-vjeҫar, marrëdhënien me të ëmën e ka të hapur. Të dy flasin e komunikojnë si shokë.
“Komunikimi është një cilësi që do ta veçoja. Më ka ndihmuar shumë komunikimi i saj. Forca është gjëja që adhuroj tek ajo. Pati forcë dhe mori një hap shumë të rëndësishmë për ne. Nga ai vendim patëm shumë gjëra pozitive në jetë, por, siҫ e thashë, edhe mënyra se si ka komunikuar me mua…”, tregoi Oreni në studio.
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
