Hapat për një lëkurë të pastër dhe të butë, si një fëmijë

Duke pasur gjithmonë në mendje shprehjen “Kurrë mos vendosni mbi lëkurën tuaj diçka që nuk do e hanit”, ne po ju japim disa këshilla shumë të vlefshme. Për një lëkurë të butë e të pastër si të një fëmije, për prekje mbresëlënëse dhe të paharrueshme duhet t’i kushtojmë rëndësi të veçantë lëkurës sonë.

Duke qenë se lëkura e fytyrës grumbullon vazhdimisht papastërti, edhe pastrimi e kujdesi ndaj saj duhet të jetë i vazhdueshëm dhe i rregullt. Është e rëndësishme të theksojmë që kujdesi ndaj lëkurës duhet të jetë sa më natyral dhe produktet të jenë delikate, pa përbërës kimikë dhe sintetikë.

Rituali i zakonshëm

Përveç sapunit që të gjithë e dimë që duhet përdorur 2 herë në ditë (larje me ujë të ftohtë edhe në dimër), lëkura do edhe përkujdesje të tjera. Lëkurat e thata dhe të yndyrshme janë më problematike se lëkura normale, rrjedhimisht duan më shumë kujdes. Hapi i parë (pas sapunit) është skrabi. Në mënyrë që ajo të jetë sa më e gatshme për t’u pastruar nga pikat e zeza dhe njollat, duhet të jetë pastruar më parë nga shtresa e qelizave të vdekura, që e pengojnë lëkurën për proceset e tjera të pastrimit dhe ushqyerjes.

Skrabi duhet bërë 2-3 herë në javë për lëkurat e yndyrshme, 2 herë në javë për lëkurat e thata, 1 herë në javë për lëkurat normale (skrabi duhet bërë me shumë delikatesë pa ushtruar forcë, duke ndihmuar me lëvizje rrethore në gjithë fytyrën). Skrabi eliminon toksinat nga lëkura, qelizat e vdekura dhe papastërtitë e sipërfaqshme, të cilat e bëjnë lëkurën të duket pa jetë, e vrazhdë dhe e plakur. Përveç kësaj, qelizat e vdekura bllokojnë poret duke mos e lënë atë të ajroset siç duhet, madje as të lahet siç duhet me sapun. Pra, është një hap i domosdoshëm. Pasi është hequr shtresa me qeliza të vdekura, lëkura është më e gatshme të pastrohet dhe ushqehet në thellësi.

Avulli, i cili duhet bërë të paktën një herë në muaj, (avulli duhet bërë pas skrabit siç shpjeguam më lart). Ky ndihmon në qarkullimin e gjakut dhe në pastrimin e pikave të zeza. Skrabi dhe avulli ndihmojnë edhe në pakësimin e akneve apo puçrrave. Shtoni vaj esencial të livandos dhe sherebelës, që avulli të jetë më i efektshëm për pikat e zeza, ose vaj esencial rozmarine, që avulli të jetë më çlodhës për lëkurat e stresuara. Kujdes, avulli nuk duhet të zgjasë më shumë se 10 minuta.

Maskë pastruese dhe ushqyese pas avullit

Maska është e përsosur për pastrim të thellë të pikave të zeza, zbehje të njollave kafe dhe qukave, si edhe në ushqyerjen dhe hidratimin e lëkurës.

Pas skrabit, avullit, maskës, rituali përfundohet me masazh fytyre. Për masazh duhet patjetër vaj bajamesh të ëmbla, lajthie ose kokosi të cilat ndihmojnë në mbylljen e poreve dhe në raste më problematike kokosi vazhdon pastrimin e pikave të zeza duke i nxjerrë ato më në sipërfaqe, kështu do ta keni më të lehtë pastrimin e tyre me një tampon pambuku. Pra, masazhi me vajra ndihmon në pastrim akoma më të thellë, shtrëngim poresh, tonifikim të lëkurës së fytyrës dhe ushqim të vazhdueshëm të saj.

Këshilla të tjera të specialistëve janë këto:

Në momentin që zgjidhni produkte të shtrenjtë për fytyrën tuaj, lexoni mirë përmbajtjen e tyre në etiketë. Nëse etiketa përmban dhjetëra emra kimkatesh që as nuk i njihni, bëni mirë të mos e blini.
Në momentin që vendosni ta blini, atëherë duhet që të gjitha produktet të jenë të paktën të një linje. Nuk është mirë që kremi i ditës të jetë linjë tjetër, kremi i natës nga një linjë tjetër, pastruesi i makiazhit tjetër linjë, e kështu me radhë.
Mos bëni skrabe, avull e pastrime më tepër se ç’duhet sepse e dëmtojnë lëkurën.
Përmbajtjet agresive shmangini plotësisht.
Masazhoni fytyrën çdo natë para se të flini, kjo do të ndihmojë jo vetëm për një gjumë të qetë, por edhe për ta mbajtur fytyrën në formë.
Mos e prekni lëkurën gjatë ditës me duar të papastra. Duart mbajnë shumë mikrobe, të cilat e “sëmurin” lëkurën e fytyrës.

Burimi / gsh.al

Artikuj të ngjashëm