Vetëm pak kohë pas vdekjes së Besnikut, bashkëshortit të saj, Irma Libohova nga studio e programit “E diell” nuk iu shmang pyetjes së Adi Krastës për gjendjen e saj emocionale.
Ashtu si edhe disa javë më parë, Irma tha se ajo e ka të lidhur jetën me skenën, por jetën private e ka për vete, dhimbjen po ashtu për vete: “Unë i përkas muzikës dhe në skenë do të jem gjithmonë. Dhimbjen, ҫdo njeri e ka për vete, e mban për vete. Besoj që duhet ta përballojë dhe ta përjetojë fort… Pastaj, ka shumë gjëra që e lidhin, janë kujtimet… Jeta vazhdon.“ – tha Irma ndër të tjera.
Por nuk e ka të thjeshtë t’i mbajë lotët pas pyetjes së dytë të Adit (fillimisht donte t’i bënte vetëm një) se si është jeta tani, si është ta jetosh jetën tani… “Unë jam vetëm, por nuk jam e vetmuar. Jam e rrethuar nga miq, nga njerëz të afërm. I vetmi moment i vështirë…, – tha Irma pa i mbajtur dot lotët,-… është mbrëmja, sepse atëherë ndihet më shumë. Megjithatë, gjej forma, me muzikë, me diҫka tjetër, shkoj në palestër, e mbush kohën që të mos e ndiej shumë mungesën.”
“The Show Must Go On”, si për shumë artistë të tjerë, edhe për Irmën është një shprehje e fuqishme që, me siguri, e kanë vetëm artistët e vërtetë dhe ata që e dinë mirë se publiku të vlerëson edhe më shumë kur dhimbjen e mposht edhe për hatër të tij./Panorama
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
