Sikundër dhjetëra histori shqiptare të vuajtjes nga regjimi i pasluftës, rasti e solli që në rrugë krejt rastësore, njëra prej mbesave të familjes Topalli të zbulojë historinë e dhimbshme të familjes së saj. Ja se çfarë shkruan në postimin e saj në rrjetin social Facebook, Jozefina Topalli.
Të dashur miq.
Para disa ditësh duke vizituar Porto Palermon, Xhoana Topalli gjeti të gdhendur në muret e saj emrin e xhaxhait , Ferdinand Topalli.
Ferdinandi ishte 12 vjeç kur e internuan aty bashkë me të vëllanë, Kolec Topallin 10 vjeç, të motrën Suzana Topalli 16 vjeçe dhe nënën e tyre. Ndërkohë vëllanë 18 vjeç, Genarin, e kishin futur në burg bashkë me të atin.
Familja e tyre u ndëshkua për fajin e vetëm se Nush Topalli ishte një tregtar i madh dhe i biri tjetër (20 vjeç) u arratis nga vendi.
Siç shihet në foton poshtë, ishte 10 Dhjetor 1949.
Ndërkohë, në Shkodër sundonte një frikë e terror i padëgjuar. Familje të shumta u internuan në Tepelenë dhe Porto Palermo.
Fotoja poshtë është shenjë e një historie të dhimbshme, jo thjesht për familjen tonë. Në atë kamp kanë vdekur nga uria e kushtet e tmerrshme shumë fëmijë.
Ajo është një thirrje për kujtesë.
Për mua e familjen time është thellësisht prekëse, sepse pas dy ditësh që gjetëm të gdhendur në mur nga një fëmijë 12 vjeç emrin e tij e datën e internimit, njeriu jonë i dashur Ferdinandi ndërroi jetë.
Ishte ndër njerëzit më të drejtë e më të ndershëm që mund të njohësh në jetë.
I dashur dhe i papërtueshëm, me t’u gjend në çdo kohë.
Vetëm po ta pyesje, fliste për kohën e internimit;
natyrisht pa urrejtje dhe me buzë në gaz.
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
