Nuk ka ndonjë mënyrë për ta zbutur këtë fakt: ndarjet vërtet janë të vështira për gjithsecilin! Sidoqoftë, sipas psikologëve, periudha se sa ju zgjatë dhimbja varet nga ju.
Ndonëse në kohërat moderne është bërë normale të besojmë se një i dashur i ri dhe ushqimi i ëmbël është gjithçka çfarë na nevojiten për të vazhduar jetën dhe për ta harruar ndarjen, psikologu Guy Winch shpjegon se ndarjet ndikojnë te ne shumë më shumë se ç’mund ta mendojmë.
Sipas tij, studimet e kryera kanë treguar se ndarja aktivizon të njëjtat mekanizma në tru të cilët aktivizohen kur personat e varur nga droga heqin dorë nga substancat si kokaina apo opioidet. Me fjalë të tjera, dashuria krijon varësi dhe thyerja e zemrës na bën që të kalojmë në një periudhë jashtëzakonisht të keqe. Kjo shpjegon arsyen se përse na merr malli dhe na mungon ish- partneri/ja sikur të ishte drogë e cila na është ndaluar.
Prandaj, në mënyrë që ta kemi sa më të lehtë ndarjen nga dikush, psikologët thonë se është shumë e rëndësishme që çdo mendim që kemi për atë person të jetë real dhe i balancuar, e të mos idealizojmë askënd. Pra, nëse mendja ju rikujton momentet e lumtura së bashku, ju gjithashtu duhet të rikujtoni imazhet nga fundjava ku partneri/ja ju ka bërë jashtëzakonisht shumë nervoz. Duhet të rikujtoni netët kur jeni fjalosur për gjëra të kota dhe të shkruani një listë me të gjitha arsyet se përse lidhja nuk ka funksionuar.
Një tjetër gjë interesante rreth ndarjes është se gjithmonë lëndohet më pak personi që kërkon ndarjen. Sidoqoftë, sa i përket tejkalimit të fazës së dhimbshme të ndarjes, psikologët u rekomandojnë disa këshilla:
- Mos e ndiqni atë në rrjete sociale.
- Shmangni krijimin e “teorive konspirative” se përse ka ndodhur ndarja.
- Bëni një listë me të gjitha kompromiset që keni pranuar në atë lidhje, por që nuk do t’i kishit pranuar në lidhjen e ardhshme.
- Bëni gjërat që ju sjellin kënaqësi.
- Largoni çdo rikujtim të lidhjes që mund t’ju shkaktojë stres ose dhimbje, si mesazhet apo fotografitë.
- Bisedoni me miq për të pasur mbështetjen e plotë të tyre.
Burimi / telegrafi.com
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
