Jeta në një karrocë me rrota nuk ka qenë fare e lehtë për Erblinin. 29-vjeçari Erblin Karaj i cili këtë vit ka nisur universitetin, tregon në një intervistë për abcnews se ka zgjedhur një shkollë private për të vazhduar studimet e tij, për shkak se universitetet publike nuk mund t’i ofronin kushtet e nevojshme për të.
“Unë ndjek vitin e parë të shkollës së lartë për informatikë. Kur mbarova gjimnazin krijova idenë se mund të punoësohem diku por ishte shumë e vështirë. Prandaj fillova shkollën e lartë.“, tha ai.
I riu thotë se mungesa e infrastrukturës në institucione dhe e aksesit në transportin publik, janë vështirësitë më të mëdha. Në një ditë me shi ai thuajse e ka të pamundur të dalë nga shtëpia, pasi karroca që përdorë është elektrike.
“Kur dal nga banesa është një motor me bateri që përdor, që shkoj në shkollë sepse me autobus e kam të pamundur. Gjatë kohës me shi e kam të pamundur sepse normalisht po të rrish me një çadër do të lagesh.”, shtoi ai.
Sociologia Marsida Simo thotë se arsimimi dhe punësimi janë problematikat kryesore për kategorinë e personave me aftësi ndryshe.
“Mësimi bëhet i vështirë për personat me aftësi ndryshe sepse gjenezë kur këta persona kanë lindur të tillë, që në shkollën e tyre dhe me marrjen e këtyre aftësive që iu duhen atyre për tregun e punës. Tregu i punës përthithi këdo që është i aftë por mungon pjesa e infrastrukturës dhe aksesit. Pra, punësimi është një punë shumë herë më e gjerë që duhet menduar për arsimin“, tha sociologia.
Sot është dita e personave me aftësi ndryshe dhe sipas OBSH mbi 1 miliard njerëz në të gjithë planetin janë të prekur nga aftësitë e kufizuara, që është rreth 15 për qind e popullsisë së botës.
Burimi/abcnews.al
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
