Shumë prej nesh në momentin ku vendosim të fillojmë aktivitetin fizik ose stërvitjen në palestër gjendet para një dileme shumë të madhe. Le ta pranojmë. Palestra mund të jetë një vend që si fillim na bën të hezitojmë, sidomos kur nuk e kemi frekuentuar kurrë më parë atë ose e kemi lënë pas dore për një kohë të gjatë. Por si funksionon saktësisht një regjim i rregullt në palestër? Instruktore Linda Kalemi me përvojë akademike në këtë fushë, na orienton me disa këshilla të domosdoshme për një trup të rregullt para se të shkojmë në plazh.
Linda Kalemi, balerinë,
instruktore në Pilates Albania
Një pjesë e konsiderueshme e popullsisë ka filluar ta kuptojë rëndësinë e palestrës. Kjo vihet re më tepër kur fillojnë problemet shëndetësore sidomos tek moshat e mesme. Ndërsa tek të rinjtë shfaqet si modë, dëshira për të gjetur një ambient ku të socializohen me shoqërinë, të hedhin stresin e ngarkesës së studimeve. Këto kategori kanë një marrëdhënie të gjatë dhe shumë të rregullt me palestrën. Masa muskulare, ulja e masës dhjamore, pesha perfekte, ushtrime me pesha, kardiovaskulare, argëtime në programe aerobie janë disa nga pretendimet e tyre.
* Në raste kur nuk ka mundësi, frekuentimi i palestrave mund të bëhet me ecje sportive në ajër të pastër herët në mëngjes ose pas orës 19.00. Gjithmonë stomaku nuk duhet rënduar:
* I pa ngrënë me një kafe + biskotë ose 2 orë pas buke. Gjatë ecjes në grupe nuk duhet biseduar gjatë, krijon mbilodhje, ul performancën, dëmton kordat e zërit.
Ky program mund të finalizohet me ushtrime tonifikuese. Ushtrimi më klasik, por më i efektshmi për zonën e barkut:
* Mbi bar shtojmë një shtresë apo peshqir, shtrirë mbi shpinë. Gjunjët e thyera, duart i vendosim poshtë qafës dhe ngrihemi-shtrihemi disa herë.
Ndërsa për vithet:
* Qëndrojmë në të njëjtin pozicion, shtrirë mbi shpinë vetëm ngremë-shkëpusim dhe vendosim përsëri vithet nga toka disa herë. Këto ushtrime mund të aplikohen në ambientet e shtëpisë, por jo në shtresa të buta si shtrat apo divan, mjafton një peshqir mbi tapet.
* Nëse jeni në buzë të detit është mirë të ecni në breg brenda në cektësinë e ujit. Kjo shërben për të ngarkuar forcën që ushtron uji te këmbët. Mund të krahasohet me peshat e veglave të palestrës. Ushtrimi tjetër mund të bëhet në thellësi mesatare. Bëhet vrap në ujë duke lëvizur maksimalisht këmbët, trupin, duart, supet. Është vërtet e lodhshme, por e efektshme. Kjo bëhet sa herë laheni në det, ndërsa noti qoftë edhe në cektësi, duke zgjatur krahët e këmbët shërben si program strechingu, tonifikimi, joga. Pasi t’i bëni këto lëvizje, në intervale mund të lëshoni trupin të lirë në ujë, nën lëkundjet e valëve. Lëreni që uji t’ju përkëdhelë trupin në çdo skaj. Ky është një lloj masazhi, relaksi. Dëgjoni tingujt që lëshon uji. Shkëpusni vëmendjen nga realiteti, por lëreni imagjinatën tuaj të krijojë ambiente të tjera. Ky është një meditim ideal natyral. Do të shihni që stresi do largohet.
Çelin lulet, çelen dhe dyert e palestrave. Fatkeqësisht jemi sezonalë, sidomos femrat. Arsyeja: trupat do zhvishen për t’u prezantuar buzë detit.
Ja disa këshilla
Këshillohet vetëm që në muajin e parë të bëni rreth 10-20 minuta vrap përpara dhe pas stërvitjes. Dijeni se java e parë e palestrës është ajo më e vështira. Ndërkaq fillon të kuptohet nga ju e instruktori se cili është programi që përkon me forcat e tua. Me fillimin e muajit të dytë, instruktori do të ndryshojë programin. Bashkëpuno me të për të ecur me tej. Ki parasysh që kur nuk ndjen se nuk ia del dot më, do të thotë që je larg nga limiti yt i vërtetë. Këshillohet vrap edhe gjatë muajit të dytë, por jo më shumë se 10 minuta nga fillimi në fund. Përballoji kështu edhe të gjithë muajt e tjerë, por duke kërkuar gjithmonë të kapërcesh limitin tënd edhe me ndihmën e instruktorëve. Është e gabuar të konsultoheni nga miqtë apo të merrni programe prej tyre. Konstruktet dhe veçoritë e tjera nuk janë të njëjta. Mund të dëmtoheni, të pësoni trauma të pariparueshme. Mbaj gjithmonë parasysh se muskujt rriten kur pushojnë. Prandaj, pushimi është themelor. Puna e tepërt rrezikon t’ju stresojë ndaj do të arrije efektin e kundërt me atë që dëshiron. Konsumo shumë ushqim me proteina, sidomos pas stërvitjes. Mos u stërvit shumë në periudha të nxehta. Në verë përpiqu vetëm për stërvitje mirëmbajtëse, sepse do të rrezikoje të dështoje gjithë punën e bërë në dimër.
Si përfundim: Për të gjithë ata që dëshirojnë të jetojnë gjatë, që të jenë në formë apo edhe të paraqitshëm: lëvizni sa më shumë, në palestër apo jashtë saj. Atë çka hani digjeni, konsumojeni. Ky nuk është një aktivitet, por si çdo qenie e gjallë është funksioni më natyral edhe yni.
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
