Është ndarë nga jeta poeti i njohur shqiptar, Agim Doçi, i cili pësoi hemorragji celebrale të shtunën (22 Qershor).
Agim Doçi qëndronte në reanimacion prej ditës së shtunës pranë Neurologjisë në Tiranë. Lajmi për ndarjen nga jeta të poetit të mirënjohur u konfirmua nga familjarët e tij.
Ceremonia e varrimit do të mbahet ditën e martë në Tiranë, ndërsa homazhet do të zhvillohen në orën 11:00.
Jeta e poetit
Agim Doçi ka lindur më 9 maj 1948. Është poet dhe tekstshkrues i njohur këngësh.
Ēshtë arsimuar në Shkodër deri në gjimnaz dhe ka vazhduar më pas studimet e larta në Universitetin Shtetëror të Tiranës në Fakultetin e Inxhinierisë Elektrike. Ka punuar si inxhinier në Montimet Industriale duke marrë pjesë në shumë objekte të rëndësishme si Fabrika çimentosh, Metalurgjik, Superfosfat Laç, Poligrafik Tiranë etj. Në vitet e fundit të ’80 ka punuar pranë Kombinatit të Drurit “Misto Mame” si kryeinxhinier për energjinë. Në 1989 dënohet duke u caktuar të punojë me tre turne në fabrikën e letër-kartonit. Përfshihet në lëvizjet e dhjetorit 1990.
Është autor i shumë teksteve të këngëve shqiptare, fituesi i mbi 50 çmimeve, ndër to dhe dy herë perfaqësues me tekstet e tij në Eurovizion. Veçohet bashkëpunimi me kompozitorin Edmond Zhulali në shumë këngë të festivaleve në Shqipëri dhe me mbi 100 këngë për luftën e Kosovës. Mund të përmenden këngë shumë të njohura si “Marrshi i UÇK-së”, “A vritet pafajësia”.
Ka botuar disa libra me poezi si ‘Hajde dru me pre’, ‘Rrëzuar mbi vetminë’, ‘Rituali i kryqëzimit’.
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
