Poeti gdhend vargjet e dala prej shpirtit. Kështu ka vendosur t’ia bëjë urimet për Vitin e Ri, poetesha Iliriana Sulkuqi.
(Për miket e mia, gjithëjetësore, pavarësisht nga profesioni dhe mosha)
Iliriana Sulkuqi Poete
Nuk bëj pjesë në asnjë organizatë apo shoqatë feministe, por nuk do të thotë se nuk jam e juaja apo me ju, mike, kudo qofshi dhe çfarëdo “detyrash” keni marrë përsipër brenda të qenit tuaj si vajza, si gra, si nëna, si gjyshe, si pjesë e lakuar dhe e përfolur e njerëzimit , në të gjitha kohërat. Për mua jeni ato që unë mbaj brenda vetes dhe në Fjalën e vargut tim (zanafillë e krijimtarisë sime), si Shëmbëlltyrë e Krijesës së Dashurisë, e Dhimbjes, e Faljes, e Paqes!
Ky fundvit nuk është fundi i Botës, por Fillesa e një Bote të Re, që Përtërihet nga ju, me të gjitha lutjet e ëndrrave tuaja! Është mirësia e pranisë suaj, kudo dhe kurdoherë, që Bota ende merr frymë.
Nëse do të mundja, do të bashkoja të gjitha akrepat e orëve (që, sipas meridianëve, ndryshojnë me vendndodhjen e njëra-tjetrës), me orën time, kur bashkoj Urimin tim, fiks, në të njëjtën sekondë me ju dhe me Fjalën time: Gëzuar!
Jetofshi për t’u jetuar nga të gjithë sa ju shohin në sy, ju mbështesin në çdo hap dhe, për gjithçka që u shtrohet në tryezë, nga “menyja” e shpirtit tuaj, ju thonë: -Të lumshin duart!
Gëzuar, për një Fillim të Ri, me Kryefjalën – Paqe dhe Dashuri, miket e mia të vyera! Gëzuar!
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
