Kur te fëmija fillon pjekja seksuale në të njëjtën kohë fillon edhe adoleshenca dhe kjo gjë ndodh rreth moshës 12-14 vjeç. Trupi i tij “pushtohet nga stuhia hormonale” që është vetëm një nga problemet e kësaj moshe. Problemi më i madh është se edhe truri si organ edhe mëndja si proces psikik, janë në transformim, rritje dhe zhvillim.
Ilira Gjika, Mjeke Pediatre
Fëmija që nuk është më fëmijë, fillon të riorganizojë të gjithë mënyrën e tij të të parit e të pranuarit të gjërave. Riorganizon edhe njëherë raportet me veten, me të tjerët, dhe mjedisin. Riorganizon marrëdhëniet, por ndërkohë emocionet e tij mund të shfaqen papritmas, intensive, por mëndja është e paaftë për të ndërhyrë e qetësuar, pasi ajo pjesë e trurit (korteksi prefrontal), nuk ka arritur ende pjekurinë e duhur, për të lejuar mendjen të realizojë qetësimin e furisë emocionale, që haset shpesh te adoleshentët.
Pra gjithë ky proces, ky transformim dhe organizim kërkon kohë që të bëhet i plotë. Dhe natyrisht, roli i të rriturit është i padiskutueshëm, madje është detyrë e të rriturit, sidomos e mësuesve dhe e shkollës që me metodat pedagogjike dhe aktivitetet sportive dhe kreative të ndihmojnë adoleshentët të mos bien pre e papjekurisë së moshës së tyre.
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
