Viti që po lëmë pas ka qenë për secilin prej nesh një kapitull i veçantë, i mbushur me momente të bukura dhe sfida të papritura. Jemi lënduar nga një fjalë më shumë, jemi trishtuar për një ikje të beftë nga kjo jetë, kemi qarë dhe kemi qeshur, jemi lodhur, rënduar por dhe kemi shkëlqyer. Janë çaste që në 365 ditë kanë lënë gjurmë në jetën tonë.
Humbjet dhe fitoret janë dy anë të paanshme të jetës, pa të cilat nuk do të kuptonim rëndësinë në plotësi të saj. Teksa afrohet fundi i vitit, kemi mundësinë të reflektojmë mbi gjithçka që kemi përjetuar dhe ta mbyllim këtë kapitull me një ndjenjë falenderimi, paqeje dhe shprese për të ardhmen.
Në këtë kohë të veçantë, mesazhet e bukura që shkëmbejmë me njëri-tjetrin marrin një peshë të jashtëzakonshme. Një fjalë e ngrohtë, një urim i sinqertë, apo një mendim i dërguar me dashuri mund të bëjë diferencën në ditën e dikujt. Në fakt këtë mund ta bëjmë gjatë të gjithë vitit, sepse fjalët kanë fuqinë të lidhin zemrat tona dhe të na kujtojnë se, pavarësisht distancës apo ndryshimeve mes nesh, jemi të bashkuar nga ndjenja e përbashkët e mirëkuptimit dhe dashurisë. Sot ka një pafundësi mundësish për të dërguar mesazhe të tilla. Qoftë me shkrim, një kartolinë si dikur me dy fjalë zemre, një mesazh elektronik a përmes smartfonëve, një dhuratë simbolike me përshkrimin e merituar.
Për familjarët apo miqtë e ngushtë mund të shkruani:
“Ky vit po mbyllet, por kujtimet e bukura që kemi krijuar do të na shoqërojnë gjithmonë. Faleminderit për dashurinë dhe mbështetjen tënde! Ju uroj një vit të ri të mbushur me shëndet, lumturi dhe suksese!”
“Le ta mbyllim këtë vit me mirënjohje për çfarë kemi mësuar dhe për çfarë kemi arritur. Uroj që viti i ri të sjellë paqe në zemrat tona, gëzim në jetën tonë dhe shumë mundësi të reja për të ecur përpara!”
“Ju uroj nga zemra ditë të ndritura, buzëqeshje të pafundme dhe energji pozitive për të përqafuar çdo sfidë dhe mundësi që vjen!”
“Ky vit mund të ketë pasur sfidat e veta, por çdo fund është një fillim i ri. Beso në veten tënde dhe mbaj shpresën ndezur. Viti i ri është plot mundësi dhe surpriza të bukura që presin të të gjejnë!”
“është koha për të lënë pas atë që nuk na shërben dhe për të hapur krahët ndaj së ardhmes. Të uroj një vit të ri me forcë, kurajë dhe besim për të realizuar gjithçka që dëshiron!”
Për kolegun/en ose bashkëpunëtorin/en ju mund të shkruani:
“Teksa mbyllim një tjetër vit pune dhe suksesi së bashku, ju falënderoj për bashkëpunimin dhe përkushtimin tuaj. Uroj që viti i ri të jetë edhe më i frytshëm, plot ide të reja dhe arritje të mëdha!”
“Fundviti është momenti për të reflektuar dhe për t’u frymëzuar përpara. Ju uroj një fillim të ri plot energji dhe realizim të çdo synimi tuaj!”
Për personin e zemrës mund të shkruani:
“Teksa vitet kalojnë, mësoj të të dua edhe më shumë. Të falënderoj për çdo çast të bukur dhe mezi pres t’i krijojmë kujtimet tona më të bukura në vitin që po vjen. Gëzuar vitin e ri!”
“Të gjitha ëndrrat e mia për vitin e ardhshëm përfshijnë vetëm një gjë: të vazhdojmë të jemi bashkë, duke mbështetur dhe dashur njëri-tjetrin siç kemi bërë deri tani. Urime dhe dashuri pa fund për vitin e ri!”
Fundviti është momenti ideal për të lënë mënjanë çdo keqkuptim, mërzi apo zënkë që mund të na ketë rënduar gjatë vitit. Askush nuk është i përsosur, por të gjithë kemi aftësinë të falim dhe të rindërtojmë ura komunikimi. Një “më fal” i thjeshtë apo një hap i vogël drejt pajtimit mund të krijojë një ndryshim të madh, duke na lehtësuar shpirtin dhe duke na hapur rrugën për një fillim të ri. Mesazhet mund të jenë të tilla:
“Fundviti është koha e duhur për të lënë mënjanë çdo keqkuptim dhe për të çmuar gjërat që na lidhin. Të falënderoj për pjesën që ke në jetën time dhe uroj që viti i ri të na sjellë më shumë harmoni dhe afërsi.”
“Asnjë fjalë e pashpjeguar apo moment i keq nuk ia vlen të na ndajë. Ky fundvit është një mundësi për të rilidhur zemrat tona dhe për të ecur përpara me dashuri dhe mirëkuptim. Gëzuar vitin e ri!”
“Le të harrojmë çfarë nuk shkon dhe të kujtojmë vetëm të mirat që kemi ndarë. Të uroj një fundvit plot paqe dhe një fillim të ri me zemrën të lehtë dhe të hapur për dashuri!”
“Nuk dua të hyj në vitin e ri duke mbajtur peshën e fjalëve të pathëna apo keqkuptimeve. Jam këtu për të falur dhe për të ndarë vetëm pozitivitetin që na pret përpara. Le ta bëjmë këtë vit të ri një fillim të freskët!”
“Viti i ri është një shans i ri, dhe nuk dua që asgjë të na ndalojë të jemi të lumtur dhe të bashkuar. Të uroj një fundvit të qetë dhe një vit të ri të mbushur me dashuri dhe mirëkuptim.”
“Mënyra më e bukur për ta mbyllur këtë vit është të falim njëri-tjetrin dhe të lëmë pas çdo mosmarrëveshje. Të falënderoj për momentet e bukura dhe mezi pres të krijojmë të reja në vitin e ardhshëm.”
“Teksa numërojmë sekondat drejt vitit të ri, le të lëmë pas çdo keqkuptim dhe të përqafojmë gjithçka që na bën të qëndrueshëm dhe të fortë si miq. Ju uroj një vit të ri të mrekullueshëm, plot buzëqeshje dhe kujtime të paharrueshme.”
“Ky fundvit është një kujtesë që asnjë keqkuptim nuk është më i madh se dashuria, miqësia dhe mirësia që ndjejmë për njëri-tjetrin. Të uroj të gjithë paqe dhe një fillim të ri me zemrën plot mirësi!”
“Viti që po vjen është një mundësi për të riparuar dhe për të rilidhur çdo gjë që mund të jetë dobësuar. Le të shkojmë përpara së bashku, duke lënë pas gjithçka që nuk na ka shërbyer!”
Fundviti nuk është vetëm për të përmbyllur të shkuarën, por edhe për të mbjellë farat e shpresës për vitin e ri që po vjen. Të shohim përpara me optimizëm, duke mbajtur brenda nesh forcën për të përballuar çdo sfidë që mund të sjellë e ardhmja. Secili prej nesh ka brenda vetes potencialin për të ndryshuar dhe për të përmirësuar, qoftë jetën tonë, qoftë atë të atyre që kemi pranë.
Le t’i shfrytëzojmë këto ditë për të falur, për të dashur dhe për të përhapur mesazhe pozitive. Le ta mbyllim këtë vit me mirënjohje për gjithçka që kemi dhe me shpresë për një të nesërme më të ndritur. Në fund të fundit, momentet që ndajnë dashuri, mirësi dhe bashkim janë ato që mbeten gjithmonë në zemrat tona.
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
