Angelina Jolie i është bashkuar Instagramit për një arsye të veçantë. Aktorja, e cila ka punuar për shumë kohë me organizata filantropike, bëri postimin e saj të parë dje të titulluar “Letër nga një vajzë afgane”.
Jolie vendosi të krijojë dhe të përdorë platformën e mediave sociale për të folur për krizën humanitare në Afganistan pas tërheqjes së trupave amerikane, shkruan “Page Six”. Aktorja fitoi mbi 2.9 milionë ndjekës në vetëm 6 orë.
“Kjo është një letër që më është dërguar nga një vajzë adoleshente në Afganistan. Tani për tani, njerëzit e Afganistanit po humbasin aftësinë e tyre për të komunikuar në mediat sociale dhe për t’u shprehur lirshëm. Kështu që unë kam ardhur në Instagram për të ndarë historitë e tyre dhe zërat e atyre në të gjithë globin që po luftojnë për të drejtat themelore të njeriut.
Unë isha në kufirin e Afganistanit dy javë para 11 shtatorit, ku takova refugjatë afganë që kishin ikur nga talebanët. Kjo ishte njëzet vjet më parë.
Është e dhimbshme të shikosh afganët të zhvendosen përsëri nga frika dhe pasiguria që ka kapluar vendin e tyre. Të shpenzosh kaq shumë kohë dhe para, të kesh derdhur gjak dhe jetë të humbura vetëm për të arritur në këtë, është një dështim pothuajse i pamundur ta kuptosh.
Të shikosh për dekada se si refugjatët afganë – disa nga njerëzit më të aftë në botë, trajtohen si barrë, është gjithashtu e trishtë. Të dish se nëse do të kishin mjetet dhe respektin, sa shumë do të bënin për veten e tyre.
Të takosh kaq shumë gra dhe vajza, që jo vetëm donin një arsim, por luftuan për të. Ashtu si të tjerët që janë të përkushtuar, unë nuk do të tërhiqem. Unë do të vazhdoj të kërkoj mënyra për të ndihmuar. Dhe shpresoj që ju të bashkoheni me mua”, -përfundoi Jolie.
Sipas një burimi të brendshëm, Jolie ishte e interesuar për t’u bashkuar me platformën e mediave sociale vetëm për ta përdorur si një mënyrë për të rritur ndërgjegjësimin për çështje të ndryshme humanitare.
“Angelina u ndje e detyruar të bashkohej në një moment kur gratë dhe të rinjtë në Afganistan po humbasin aftësinë për të komunikuar në mediat sociale dhe për t’u shprehur lirshëm,” tha një burim i brendshëm për “Entertainment Tonight”.
“Nga pikëpamja e saj, nëse ajo është në gjendje të jetë pjesë e përpjekjes për të përforcuar zërat e tyre, atëherë ajo ndjeu se ishte arsye e mjaftueshme për t’u bashkuar dhe përdorur platformën e saj.”
Burimi / Panorama Online
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
