E shkruaj këtë e-mail, sepse dua të ndihmoj vëllanë tim. Ai mbyllet në dhomën e tij pa asnjë motiv. Fle gjithë ditën, çohet vetëm për të ngrënë drekë, sheh TV gjatë gjithë kohës. E kam pyetur se çfarë e ka munduar këto kohë, por hesht. Ai e ka tipin e ndrojtur, por jo aq sa të jetë i pashoqërueshëm. Si t’ia bëj?
Nga Denata Toçe
Psikologe Këshillimi
Është një e mirë e madhe t’i qëndrosh pranë familjes. Midis vëllezërish, marrëdhënia është tejet e veçantë, sidomos e motrës për vëllanë. Një ditë u gjenda në një ambient kopshti, ku ndodheshin rreth 30 fëmijë. I vizitova me shumë kënaqësi dhe secili prej tyre më dhuroi një dashuri vërtet të madhe. Në një mënyrë apo tjetrën, fëmijët u qasën dhe secili tregoi temperamentin e tij. Shumica prej tyre nuk kishin nevojë t’i pyesje, sepse e fillonin bisedën vetë të parët, ndërsa disa pranuan të qëndrojnë ulur, veçmas dhe e vëzhgonin situatën nga larg. Në sytë e tyre dukej dëshira për të marrë pjesë, por jo më afër nga ç’ishin. Kështu vendosa të respektoj natyrën e tyre. Fundja, ata janë të ndrojtur.
Njëri nga ata, një djalë katër vjeç, u afrua i fundit, shumë ngadalë, duke i kaluar karriget një e nga një. Sa shumë dëshirë kisha ta pushtoja, pasi fytyra e tij e çiltër dhe e ëmbël po më rrëmbente, por natyrisht prita të afrohej vetë dhe të respektoja vendimin e personalitetit që mbarte. Kaluan pak orë dhe fëmija ishte ulur në prehrin tim. Të dy bashkë, pa folur shumë, po ndanim të njëjtën lojë.
Me këtë histori dua t’ju tregoj se dëshira dhe meraku juaj mund të tregohet me prezencën tuaj. Kjo është ndihma që mund t’i ofroni vëllait. Mos jepni përgjigje për një pyetje që nuk ju është bërë dhe mos jepni asnjë mendim apo ndihmë pa jua kërkuar. Nëse vëllai juaj ka nevojë për ju, me siguri që do t’ju qaset. Ajo që mund të bëni, është të propozoni aktivitete të përbashkëta dhe, mbi të gjitha, t’i shprehni apo komunikoni se si ndiheni.
Tregojini merakun tuaj për të, por pa qenë kurioze, cenuese e privatësisë së përzgjedhur prej tij. Jini diskrete, e matur për të vëzhguar dhe pritur lëvizjet e para që të vijnë nga vëllai juaj. Me siguri do të ndiheni e përgatitur ta ndihmoni në momentin e duhur.
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
