Ajo që shumë prindër nuk kuptojnë është se sa e dëmshme mund të jetë për një fëmijë mungesa e vënies së kufinjve. Pa rregullin (disiplinën), fëmijët do të jenë të mangët në aftësitë e rëndësishme jetësore.
Ja çfarë kanë konstatuar specialistët:
- Fëmijëve do t’u mungojë vetëkontrolli.
- Nuk do të respektojnë prindërit ose figura të tjera që lidhen me autoritetin.
- Nuk do të dinë se cila është sjellja e duhur.
- Do të jenë imponues, egoistë dhe në përgjithsi një shoqëri e pakëndshme për të tjerët.
- Nuk do të kenë aftësi sociale, të cilat janë të rëndësishme për të bërë shokë të rinj të tilla si: empatia (krijimi i ndërveprimit me të tjerët), durimi dhe të diturit se si të ndajnë me të tjerët.
- Ata do të jenë të nxitur më shumë drejt sjelljeve negative, të cilat janë të dëmshme dhe potencialisht të rrezikshme për ata vetë dhe për të tjerët.
- Nuk do të jenë të lumtur.
Tipare të fëmijëve që janë rritur nëpërmjet rregullit e disiplinës
Nga ana tjetër, fëmijët që rriten me disiplinë, por njëkohësisht me përkujdesjen dhe butësinë e duhur, kanë këto tipare:
1. Kanë më shumë vetëkontroll dhe janë më shumë zotët e vete.
2. Janë më të përgjegjshëm dhe e shijojnë “të qenit të mirë” dhe të ndihmuarit e të tjerëve në shtëpi, në shkollë dhe të botës në përgjithësi.
3. Kanë më shumë vetëbesim. E dinë që mendimet dhe ndjenjat e tyre do të dëgjohen dhe që prindërit e tyre i duan edhe kur ata bëjnë gabime.
4. E dinë që janë përgjegjës për gabimet ose sjelljen jo të mirë të tyre dhe janë më të predispozuar për të bërë zgjedhje të mira, sepse ata vërtet e dëshirojnë një gjë të tillë, jo sepse i frikësohen ndëshkimit.
5. Janë të këndshëm dhe është kënaqësi të rrish me ta. E kanë më të lehtë për të bërë shokë të rinj.
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
