Të jesh në sintoni me kënaqësinë seksuale nuk është e thjeshtë, sidomos kur je femër.
Dr. Besarta Taçi- Psikoseksologe- EMDR
Aktualisht shumë pak flitet për kënaqësinë seksuale femërore, sidomos të pakta janë informacionet që shkruhen mbi dëshirën, eksitimin dhe orgazmën.
Seksualiteti femëror shprehet në forma të ndryshme nga ai mashkullor, ja pse shqisat, përkëdheljet, ngrohtësia emocionale dhe fjalët përkatëse ndikojnë në mënyrë direkte në mundësinë e aktivizimit të platformës orgazmike, që s’duhet mohuar kurrë. Tek femra fillon në tru, duke u zhvilluar në zonat erogjene për t’u drejtuar tek ato gjenitale dhe pelvike.
Jo gjithmonë arritja e orgazmës është e mundshme. Ja pse aktualisht është çrregullimi i dytë seksual më i përhapur: 24% e grave të intervistuara nga National Social and Health Life Survery, tregon se nuk ka pasur orgazëm për të paktën 6 muaj në vitin e fundit!
Seksualiteti është pjesë e pashmangshme e shëndetit seksual. Nëse keni dyshime, ndjesi negative apo thjesht nuk e ndjeni veten në maksimumin e shprehisë së intimitetit tuaj, mos u mësoni t’i mbijetoni vuajtjes. Seksualiteti është pjesë e identitetit dhe çdokush meriton të ndjehet në mënyrën më të mirë të mundshme.
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
