Duke nisur nga 1 Qershori, shqiptarët nuk do duhet të mbajnë më maskat mbrojtëse në ambiente të jashtme. Komiteti Teknik i Ekspertëve prezantoi sot lehtësimin e masave kufizuese sa i përket situatës së krijuar nga koronavirusi.
Ambientet ku nuk ruhet dot distanca fizike dhe mjetet e transportit publik janë ato ku maska do vijojë të përdoret.
Ora policore gjithashtu shtyhet në orën 23:00 deri në 6 të mëngjesit, ndërsa nga 1 korriku, ora policore do të shtyhet edhe me 60 minuta, pra deri në orën 12 të natës.
Mira Rakacolli: Duket që situata është e kontrolluar, dhe mendojmë që ky kontroll ka të bëjë me elemente si përcaktimi i masave në përputhje me indikatorët epidemiologjikë, zbatimi i tyre dhe ndiqet mirë efekti i vaksinimit, mbulesa vaksinale që tani është vazhdimisht duke u rritur.
Në këtë situatë komiteti mendon që ka vend për lehtësim masash dhe propozon që:
Duke nisur nga 1 qershori të hiqet detyrimi për maskën në ambientet e jashtme
por do vijojë të mbetet detyrimi për mbajtjen e saj në ambiente të mbyllura dhe në mjetet e transportit publik, kudo që nuk ruhet distanca sipas udhëzimit të ISHP. Ora policore nga ora 22:00 do kalojë në orën 23:00 deri në 6 të mëngjesit”.
Masat që lehtësohen:
Nga 1 Qershori:
• hiqet detyrimi për mbajtjen e barrierës mbrojtëse në ambientet e jashtme. Do vijojë të mbetet detyrimi i mbajtjes së maskës në ambientet e mbyllura si dhe në mjetet e transportit publik. Rekomandohet mbajtja e maskës kudo ku nuk mund të ruhet distancimi social si edhe për ata që ende nuk kanë bërë dy dozat e vaksinës që konsiderohen persona në risk.
• ora policore shtyhet në orën 23:00 -06:00.
Klubet e natës, diskot, vijojnë të mbeten të mbyllura. Muzika do lejohet deri në orën 22:00.
Nga 15 Qershor:
• grumbullimet në ambientet e jashtme nga 10 persona bëhen 50 persona, duke respektuar rregullat e distancës sociale në zbatim të protokolleve të ISHP.
Nga 1 Korriku:
• ora policore shtyhet në orën 24.00 -06:00.
Orari për muzikën nuk ndryshon, pra do mbetet ora 22:00.
• lejohen kampionatet sportive me prani të tifozëve me kapacitete të reduktuara deri në 30% sipas protokollit të ISHP.
• lejohen aktivitetet e teatrove, shfaqjeve artistike dhe kulturore, konferencave, me kapacitet të reduktuar deri në 30% të spektatorëve apo pjesëmarrësve, sipas protokolleve të ISHP.
Burimi panorama.com.al
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
