Rezultatet e një anketimi nga psikologët amerikanë tregojnë se rrjetet sociale si Facebook, Twitter, Pinterest, Instagram, Snapchat dhe Tumblr i bëjnë njerëzit të ndihen të vetmuar e të izoluar. Përdorimi i përditshëm i rrjeteve sociale për dy orë ose më gjatë i dyfishon shanset për t’u ndjerë të vetmuar ose të izoluar, ndërkaq ekspozimi ndaj imazheve të ndryshme mund të shkaktojë ndjenja të inatit dhe xhelozisë.
Autorët e studimit theksojnë se ajo çfarë shohim në rrjete sociale jo domosdoshmërish mund të jetë arsyeja se përse ndihemi keq, por mund të jetë një nga faktorët sepse i nxitë emocionet të cilat veçse i ndjejmë. Sipas teorive të prezantuara në rezultatet e studimit, thuhet se sa më shumë kohë që shpenzojnë njerëzit në rrjete sociale, aq më pak kanë kohë të bashkëveprojnë në jetën reale.
Përdorimi i rrjeteve sociale mund të kontribuojë edhe në ndjenja të përjashtimit, kjo ndodh kur përdoruesit e rrjeteve sociale shohin fotografitë e miqve në ndonjë organizim në të cilin ata s’kanë qenë të ftuar.
Shkencëtarët thonë se kjo është një temë e rëndësishme për t’u studiuar, pasi problemet mendore dhe izolimi social mes të rinjve është në nivel epidemik.
Burimi / telegrafi.com
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
