Platformat teknologjike janë shndërruar në një mjet të rëndësishëm për të gjithë njerëzit krijues, të cilët, falë tyre, e kanë kthyer në një biznes fitimprurës pasionin e tyre. YouTube, Pinterest, Instagram, madje edhe Oculus Medium, janë mjete ku njerëzit kujdesen dhe krijojnë diçka në një fushë ku ata kanë prirje kreative, nga realiteti virtual tek kuzhina, fotografia etj.
Këto platforma i ndihmojnë njerëzit me interesa të përbashkëta të lidhen me njëri-tjetrin. Pyetja më e rëndësishme në këtë pikë është: si mund t’i shndërroni idetë kreative në një biznes të suksesshëm?
Më poshtë janë tre hapa se si të nisni dhe ta shndërroni një ide kreative në një biznes dixhital fitimprurës.
1.Ushqeni kreativitetin tuaj
Frymëzimi për një ide biznesi mund të lindë nga çdo gjë: nga një përvojë unike personale, tek të qenët dëshmitar i një problemi dhe gjetja një zgjidhje, madje edhe thjesht kur jeni duke ecur. Krijimtaria fshihet brenda secilit prej nesh, por pyetja është: si ta kultivoj frymëzimin dhe të bëj hapin tjetër?
Së pari, dhe mbi të gjitha, shkruani idetë tuaja. Ekspertët e produktivitetit këshillojnë se duke i shkruar gjërat ju ndihmon jo vetëm që ta kujtoni informacionin më mirë, por gjithashtu të “ktheni idetë abstrakte në një punë konkrete”.
Një tjetër mënyrë e vlefshme për të ushqyer kreativitetin është t’u drejtoheni njerëzve që ju rrethojnë. Si CEO i një kompanie dixhitale, dikur u përballa me një situatë kur një karakteristikë e një produkti nuk po merrte vëmendjen që kishin parashikuar, kështu na u desh të gjenim një mënyrë për ta bërë më tërheqëse për përdoruesit. Nëpërmjet mbledhjeve të shumta brenda kompanisë, e testuam e më pas përmirësuan dhe më pas vazhduam ta përsosim deri sa arritëm më së fundi në një zgjidhje të vlefshme (dhe të suksesshme). Në të njëjtën mënyrë, duke përsëritur dhe duke përsosur idetë kreative ju mund t’i bëni ato ide (dhe përmbajtjen tuaj) edhe më të mirë.
2. Gjeni vendin tuaj
Të ndërtosh një biznes do të thotë të krijosh një përvojë dhe ta vësh në kontakt me njerëz të cilët i besojnë asaj. Pasi të keni ushqyer kreativitetin tuaj, hapi tjetër është të përcaktoni vlerat e biznesit tuaj, ose vendin. Çfarë i dallon idetë tuaja dhe përmbajtjen nga të tjerët në hapësirë? Nëse ju mund të përcaktoni me saktësi vendin tuaj – aty janë edhe paratë – njerëzit do të paguajnë për përmbajtjen e cila është unike dhe në përputhje me pasionin e tyre.
Ju duhet të mbani parasysh një gjë: sa më specifike të jetë përmbajtja, aq më të mëdha janë mundësitë për të ndërtuar një biznes.
Platforma si Twitter, Instagram dhe Reddit mund të duken gjigante në pamje të parë, por ju mund t’i përdorni ato në avantazhin tuaj.
3. Përdorni teknologjinë e duhur
Teknologjia luan një rol vendimtar tek njerëzit krijues në ndërtimin e një biznesi duke i dhënë vlerë përmbajtjes së tyre.
Së pari, identifikoni mjetet e duhura që do t’ju ndihmojnë të shpërndani idetë tuaja tek audienca. Shumëçka varet nga hapësira në të cilën jeni duke punuar.
Shumë njerëz, për shembull, zgjedhin Adobe për të projektuar përmbajtjen vizive; për të krijuar objekte në realitetin virtual ju vjen në ndihmë Oculus Medium; Unity është një platformë me instrumente që ndihmojnë “artistët dhe zhvilluesit të krijojnë përmbajtje kinematografike dhe sekuenca gameplay; po ashtu është edhe YouTube për të shpërndarë videot tuaja. Cilado platformë që të jetë, sigurohuni që t’ju ndihmojë që ideja juaj të shihet nga sa më shumë njerëz.
*Joe Hyrkin, CEO Issuu
Burimi: INC/Monitor
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
