Mendimet nuk janë fakte, por ndonjëherë ato mund të jenë mjaft bindëse. Dhe gjatë kohërave të pasigurisë mendimet shqetësuese kanë një mënyrë për të rrëmbyer mendjen.
“Ankthi është një reagim shumë i zakonshëm ndaj të panjohurës sepse ndihet si një kërcënim për sigurinë tonë mendore, fizike ose emocionale”, thotë psikologia klinike Ayanna Abrams. “Kur ankthi është i lartë, ai mund të kufizojë aftësinë tonë për të zgjidhur problemet në mënyrë efektive, mund të fillojë të na ndikojë fizikisht, duke na bërë që të tërhiqemi dhe të na lërë të rraskapitur, konfuz dhe të paplotësuar”.
Ndërsa ne nuk mund t’i kontrollojmë gjithmonë mendimet tona, Abrams na kujton se ne mund të kontrollojmë reagimin tonë ndaj tyre. Këtu janë disa strategji për të larguar mendimet shqetësuese:
- Merrni në konsideratë atë që e dini se është e vërtetë.
Kur pasiguria për të ardhmen fillon të ndikojë në përvojën tuaj të së tashmes, Abrams rekomandon t’i kujtoni vetes atë që dini se është e vërtetë. Shikoni përreth mjedisit tuaj dhe merrni parasysh gjërat reale dhe të prekshme që janë rreth jush. “Kjo gjithashtu ju lidh me shqisat dhe trupin tuaj, të cilat mund t’iu bëjnë të ndiheni rehat dhe të sigurt në mes të pasigurisë,” shton ajo.
- Mos harroni shqetësimin që ekziston.
Mendimet e përsëritura duan rezistencë. Me fjalë të tjera, kur përpiqemi ta largojmë një ndjenjë me gjithë forcën tonë, ajo tenton të kthehet shumë më e fortë. Kjo është arsyeja pse Abrams thotë se gjatë momenteve të shqetësuara, është thelbësore t’i kujtoni vetes se “ankthi juaj po përpiqet t’ju mbrojë nga diçka, edhe nëse ndonjëherë e bën atë gabim.”
Një tjetër gjë që duhet mbajtur mend është se “heqja qafe” e stresit dhe ankthit nuk është qëllimi. Stresi është një pjesë e pashmangshme e jetës dhe detyra jonë është ta marrim atë sa më mirë që të mundemi kur vjen – dhe shkon. “Shpesh, ankthi amplifikohet sepse ne shpejt dhe në mënyrë agresive përpiqemi ta heqim atë ose ta mohojmë që ekziston, përkundrazi duhet ta lëmë atë të lëvizë mes nesh dhe të kuptojmë se në fund do të zvogëlohet”, thotë Abrams.
- Mbështetuni në një praktikë të vëmendjes si frymëmarrja e thellë ose vizualizimi.
Ju keni dëgjuar për to shumë herë dhe kjo ndodh sepse ato funksionojnë! Çdo mjet që ju ndihmon të rilidheni me trupin tuaj dhe të tashmen do të jetë një aleat që do t’ju vijë në ndihmë kur të shfaqen mendimet shqetësuese. Abrams këshillon se ato që vërtet funksionojnë janë frymëmarrje e thellë, numërim dhe vizualizim.
- Ndiqni mendimet tuaja shqetësuese për të gjetur se çfarë i shkakton.
“Të kesh të njëjtat mendime në mënyrë të përsëritur mund të jetë zhgënjyese dhe rraskapitëse”, thotë Abrams. “Ndjekja ose regjistrimi kur fillojnë këto mendime, ato që po bëni në atë kohë, ata përreth jush, mund të jenë të dobishme për të mësuar nëse mund të ketë shkas në mjedisin tuaj.” Për shembull, ajo thotë se ju mund të vini re se ju (me të drejtë!) prireni të ndiheni më të shqetësuar pasi keni parë lajmet ose keni qëndruar në mediat sociale. Filloni të mbani një ditar në të cilin do të mund të shënoni atë që do bëni herën tjetër kur të vini re se mendimet shqetësuese po fillojnë të shfaqen.
Më në fund, Abrams thotë se gjatë kohërave të shqetësimit, është thelbësore të mbani mend mbështetjen që është në dispozicionin tuaj: “Nëse e keni të vështirë ta zbatoni këtë vetë, kërkimi i mbështetjes sociale dhe terapisë mund të ofrojë lehtësim, në mënyrë që të ndiheni më kompetent kur lind ankthi”.
Burimi / https://www.mindbodygreen.com/
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
