Pothuajse një milion gra kanë humbur kontrollet vitale të gjirit për shkak të pandemisë së koronavirusit dhe diagnostikimi i hershëm është thelbësor për të shpëtuar jetë.
Kanceri i gjirit vret mbi 11,000 njerëz në Mbretërinë e Bashkuar çdo vit, me mbi 55,000 njerëz që diagnostikohen me këtë gjendje çdo vit, raporton “The Sun”. Hulumtimi thotë se mbi 23% e rasteve të kancerit të gjirit janë të parandalueshme dhe një raport i fundit nga “Kanceri i Gjirit” nënvizoi se kontrollet e pacientëve me kancer të gjirit ranë me 70% në kulmin e pandemisë Covid-19.
Tetori është muaji i ndërgjegjësimit për kancerin e gjirit dhe këtu janë pesë gjërat që çdo grua duhet të dijë për të kontrolluar për shenja kanceri.
Hapi i parë
Filloni duke u parë në një pasqyrë, duke i vënë krahët në ije dhe duke i mbajtur shpatullat drejt. Ju duhet të kërkoni për gropa, lëkurë të fryrë, skuqje, ose për ndryshime në thithkë.
Hapi i dytë
Duke qëndruar përpara pasyrës, ngrini të dy krahët mbi kokën tuaj dhe kontrolloni për të njëjtat ndryshime.
Hapi i tretë
Me krahët akoma mbi kokë, kontrolloni për ndonjë lëng që mund të dalë nga thithkat. Kjo mund të përfshijë lëng qumështi, të verdhë ose të holluar me ujë, ose gjak.
Hapi i katërt
Kur jeni shtrirë, përdorni dorën tuaj të kundërt për të kontrolluar secilin gji. Duke përdorur disa gishta dhe duke i mbajtur drejt dhe të bashkuara, bëni një lëvizje të vogël rrethore rreth gjinjve tuaj. Sigurohuni që e ndjeni të gjithë gjoksin.
Hapi i pestë
Mundohuni ta ndjeni gjoksin kur qëndroni në këmbë ose ulur, duke përdorur të njëjtat lëvizje të vogla rrethore. Nëse vëreni ndonjë ndryshim të pazakontë, atëherë është e rëndësishme që të vizitoni mjekun tuaj të përgjithshëm.
Indet e gjirit arrijnë deri në kockën e klavikulës dhe përtej sqetullës, prandaj është me rëndësi jetike të kontrolloni edhe këto zona. Gjinjtë ndryshojnë natyrshëm, si gjatë ciklit menstrual, kështu që duhet të njihni gjoksin tuaj, çfarë ndryshimesh pësojnë zakonisht për të ditur nëse ka ndonjë gjë të jashtëzakonshme.
Nëse jeni shtatzënë, gjoksi do të pësojë shumë ndryshime dhe ndoshta nuk do të duket kurrë njësoj. Jini të vetëdijshëm për çdo ndryshim të ri dhe vazhdoni t’i kontrolloni rregullisht. Gjatë menopauzës, gjinjtë mund të ndryshojnë madhësinë dhe formën, por është akoma e rëndësishme të vizitoni mjekun për çdo ndryshim të ri. Nëse ndonjë ndryshim ose gungë kërkon trajtim të mëtejshëm, mjeku juaj i përgjithshëm mund të rekomandojë një mamografi ose një biopsi.
Në cilën moshë duhet të shkoni për kontroll?
Rreth dy milion gra kontrollohen për kancer gjiri çdo vit. Programi i “NHS” për Kontrollin e Gjirit, aktualisht rekomandon gratë e moshës midis 50 dhe 70 vjeç dhe përfshin kontrolle çdo tre vjet.
Burimi / Panorama Online
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
