Mendja jonë ka një fuqi të jashtëzakonshme, ajo mund të na motivojë, por edhe të na sabotojë. Shpesh, pa qenë të vetëdijshëm, lejojmë që brenda nesh të nguliten bindje të rreme që na kufizojnë, na frikësojnë dhe na heqin besimin tek vetja. Këto besime nuk janë vetëm të pasakta, por edhe thellësisht të dëmshme për mënyrën si e shohim veten dhe jetën. Më poshtë gjenden gjashtë prej tyre, të cilat na pengojnë të rritemi dhe të ecim përpara dhe që ia vlen t’i njohim për t’i thyer njëherë e mirë.
1.Të tjerët do ta bëjnë më mirë se unë – Njerëzit që kanë frikë thjesht të përpiqen kanë tendencë të mendojnë se ata përreth tyre janë më të mirë se ata. Kjo është një gënjeshtër që i pengon ata të ndërmarrin veprime. Më lejoni t’ju jap një shembull. Një person me vetëvlerësim të ulët nuk do të kalojë në një intervistë pune në një kompani prestigjioze sepse është i sigurt se nuk do ta marrë kurrë atë punë. Pse? Sepse ka shumë të tjerë që janë më të mirë se ai. Kjo nuk është e vërtetë. Të gjithë kanë një shans. Ajo që e ndan dështimin nga suksesi është përpjekja dhe përqendrimi.
2.Nuk mund të jetoj pa partner – Njerëzit që nuk mund të jenë të lumtur vetëm, nuk do ta gjejnë kurrë lumturinë pranë një personi tjetër. Ata varen nga njerëzit përreth tyre. Çështja këtu nuk ka të bëjë fare me dashurinë e pastër dhe të sinqertë, por më tepër me pamundësinë për ta dashur veten. Duaje veten për atë që je. Në fund të fundit, përpara se të gjesh lumturinë me një person tjetër, duhet të mësosh të jesh i lumtur vetëm.
3.Jeta është një gjë e trishtueshme dhe e padrejtë – Pesimizmi buron nga pasiguria. Këta njerëz kanë tendencë të fajësojnë të gjithë dhe gjithçka për gjithçka që u ndodh në jetën e tyre. Ata fajësojnë jetën, Zotin dhe njerëzit përreth tyre për të gjitha problemet e tyre. Kjo është arsyeja pse lind bindja se jeta nuk është e drejtë. Në të vërtetë, ne formohemi nga vendimet që marrim dhe zgjedhjet që bëjmë. E vetmja gjë përtej kontrollit tonë është vdekja. Sidoqoftë, jeta është jetë, me uljet dhe ngritjet e saj.
4.Është e kotë as të provosh – Edhe nëse përpiqesh, gjithmonë ekziston mundësia që të mos kesh sukses. Megjithatë, do të dështosh plotësisht nëse ndalon së provuari! Dorëzimi nuk do të të bëjë më të lumtur. Dështimi është i natyrshëm. Nëse qëllimet do të ishin kaq të lehta për t’u arritur, ato nuk do të quheshin qëllime.
5.Është tepër vonë – Të them të drejtën, nuk është kurrë vonë për të bërë diçka. Gjithmonë mund të gjesh një punë të re ose një dashuri të re. Mund të fillosh një hobi të ri në çdo kohë. Pavarësisht sa vjeç je. Të gjithë kanë mundësinë të provojnë përsëri e përsëri. Jeta vazhdon. Asgjë nuk ka mbaruar ndërsa jemi gjallë.
6.Nuk jam i mirë në asgjë – Nuk është aspak kështu. Nuk ka askush në botë që mund ta thotë këtë për ty. Në fakt, të gjithë jemi të ndryshëm. Ti mund të jesh i aftë të bësh gjëra që të tjerët as nuk mund t’i imagjinojnë. Thjesht duhet të besosh në veten tënde. Këtu fillon udhëtimi për t’u bërë vetvetja. Udhëtimi për t’u bërë një person më i mirë dhe më i sigurt në vetvete.
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
