Arritja e lumturisë bashkon të gjitha qeniet njerëzore. Megjithatë, ne shpesh hasim një armik që na pengon: veten tonë, për shkak të kufijve që me ose pa vetëdije i vendosim vetes.
Shumë njerëz kapen pas ideve të caktuara me sigurinë se ato përfaqësojnë atë që u nevojitet për të qenë të lumtur, në realitet ata vetëm pakësojnë aftësinë e tyre për të arritur lumturinë e vërtetë. Problemi themelor është vetë përkufizimi i “të qenit i lumtur”, pasi, siç shkruante James E. Talmage, një nga dilemat më të mëdha të njeriut sot është njohja e ndryshimit midis lumturisë dhe kënaqësisë.
“Lumturia nuk nënkupton domosdoshmërisht sukses, prosperitet apo arritje të mëdha; shpesh vjen nga kënaqësia e përpjekjes shpresëdhënëse, e përkushtimit të energjive tona për një qëllim të drejtë. Rrënja e lumturisë së vërtetë është mbjellë në vetëmohim dhe lulja e saj është dashuria” – William George Jordan –
Lironi veten nga zinxhirët për të qenë më të lumtur
Duke marrë parasysh stilin aktual të jetesës, për të qenë të lumtur, nuk keni nevojë të bëni më shumë ose të merrni më shumë: ajo që duhet të bëni është të lini, të ndaloni së bëri dhe të harroni disa prototipa të sjelljes. Edhe në epokën e lirisë, ne mbetemi të lidhur me një sasi të madhe zinxhirësh të padukshëm që nuk na lejojnë të jemi vetvetja.
Çlirimi nga këto zinxhirë dhe lënia e disa ideve na sjell më afër lumturisë se çdo gjë tjetër. Më poshtë jepen idetë që duhen braktisur:
- Ndaloni së kërkuari miratimin e të tjerëve
Filloni të mendoni për pritjet tuaja dhe mos u varni nga mendimet e të tjerëve. Mos lejoni që të tjerët të manipulojnë vendimet tuaja ose të organizojnë jetën tuaj. Jetoni sipas vlerave tuaja. Nëse vareni nga besimet e të tjerëve, atëherë bëni gjëra për ta, duke ndjekur interesat e tyre; por cilat janë tuajat?
- Hiqni dorë nga zemërimi dhe pakënaqësia
Zemërimi dhe inati ju gllabërojnë nga brenda. Ju vetëdënoheni, e bëni veten të pakënaqur, i ngarkoni vetes barrën e shkaktuar nga dikush tjetër. Mësoni të jetoni në paqe me ata që ju kanë lënduar, falja do t’ju bëjë të ndiheni më të lehtë, ndërsa ata që ju zemërojnë ju kontrollojnë. Rifitoni kontrollin e vetes duke hequr dorë nga pakënaqësia dhe duke falur.
“Jeta bëhet më e lehtë kur mëson të pranosh faljen që nuk e ke marrë kurrë” – Robert Braul –
- Hiqni dorë nga ideja e përsosmërisë
Të synosh përsosmërinë në fusha të caktuara është për t’u lavdëruar, vetëm nëse flasim për të në aspektin shpirtëror. Të duash dhe të vlerësosh përsosmërinë është gjithashtu e admirueshme, por të jetosh për përsosmëri është shumë ndryshe. Ndaloni së menduari për trupin perfekt, partnerin perfekt, jetën perfekte, gjërat perfekte. Kërkimi i vazhdueshëm i përsosmërisë mund t’ju bëjë të fiksuar dhe madje t’ju mbajë prapa, duke ju penguar të ecni përpara.
- Hiqni dorë nga ideja e pasurisë dhe fatit si simbole të lumturisë
E keni dëgjuar tashmë këtë frazë: paratë nuk sjellin lumturi. Shumë njerëz, për të justifikuar pakënaqësinë e tyre, përgjigjen në të njëjtën mënyrë, duke thënë “ndoshta jo, por sigurisht që ndihmojnë”. Në realitet, fakti është se ata nuk i kanë dhënë kuptim ekzistencës së tyre dhe kjo i bën të pakënaqur. Paratë nuk kanë të bëjnë me lumturinë. Është mënyra për të vlerësuar atë që keni dhe atë që jetoni për t’ju sjellë më afër lumturisë, pavarësisht nga pasuria juaj.
“Pasuria e njeriut nuk qëndron në pasurinë e tij, por në atë që i lë botës” – Yasmina Khadra –
- Mos bëni justifikime
Mos gjeni justifikime. Nëse diçka nuk është në rregull, merrni masa. Nëse keni nevojë për diçka që nuk e keni, punoni shumë për ta marrë atë. Nëse nuk mund të arrini atë që ju nevojitet, kërkoni një alternativë. Nëse doni të bëni ose të mësoni diçka, çfarë prisni për të filluar? Nëse diçka nuk të pëlqen, ndryshoje.
“Kini kujdes kur thoni se është tepër vonë. Ky është një justifikim për të hequr dorë. Askush nuk mund t’ju ndalojë të arrini suksesin, përveç vetes tuaj” – Wang Deshun-
- Hiqni dorë nga kokëfortësia
Mos jini kokëfortë dhe pranoni njëherë e përgjithmonë gabimet tuaja, pranoni se keni mendime të gabuara dhe sjellje joproduktive. Njohja dhe korrigjimi i gabimeve tuaja nuk do t’ju bëjë më të dobët. Sa më pak kokëfortë të jeni, aq më të hapur do të jeni ndaj ndryshimeve pozitive dhe më fleksibël për të zgjidhur problemet.
“Dallimi midis këmbënguljes dhe kokëfortësisë është se e para rrjedh nga një vullnet i madh, ndërsa e dyta nga një vullnet jo i madh” – Henry Ward Beecher –
- Shkarkoni ngarkesën emocionale
Mbajtja e ndjenjave negative nga përvojat e kaluara vetëm sa do ta bëjë përparimin tuaj më të vështirë. Ndaloni së jetuari në të kaluarën. Mësoni, falni dhe ecni përpara për të qenë të lumtur. Mbajtja e dhimbjes do t’ju pengojë të shihni të gjitha mundësitë e pranishme dhe do t’ju japë një gjykim të dobët për njerëzit që kalojnë në rrugën tuaj.
Burimi / https://lamenteemeravigliosa.it/
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
