Disa ndryshime janë normale dhe pothuajse të garantuara.
Duke qenë një psikolog personaliteti, shpesh më pyesin: A ndryshojnë njerëzit? Unë përgjigjem duke treguar se sa ka gjasa që reagimi i testit të personalitetit të dikujt të ndryshojë me kalimin e kohës. Por së pari është e dobishme të dini se ka më shumë se një mënyrë se si njerëzit mund të ndryshojnë.
Ndryshimi me të tjerët ose kundër të tjerëve
Ndryshimet normative karakterizojnë njerëzit në përgjithësi, pra si ndryshon një person mesatar me rritjen e moshës. Disa argumentojnë se këto ndryshime normative pasqyrojnë maturimin biologjik universal. Të tjerë mendojnë se janë për shkak të pritshmërive të jetës tipike të të rriturve. Nivelet e tipareve të individëve ndryshojnë në krahasim me nivelet e tipareve të njerëzve të tjerë, pavarësisht nga çdo ndryshim normativ. Kjo studiohet duke u kërkuar njerëzve të kryejnë një test personaliteti dy herë gjatë disa viteve dhe duke llogaritur korrelacionet midis rezultateve të tipareve nga dy pikat kohore. Një korrelacion prej 0 do të thotë që rezultatet e personave nga testi i parë nuk thonë asgjë për rezultatet e tyre në testimin e dytë. Një korrelacion prej 1 do të thotë që ata nuk kanë ndryshuar në krahasim me të tjerët.
Çfarë do të thotë kjo për personalitetin tuaj?
Le të supozojmë se jeni në të tridhjetat ose më shumë dhe bëni një test personaliteti ‘Big Five’. Për çdo tipar, ju merrni një nga këto tre reagime: të ulëta (e treta më e ulët në grupmoshën tuaj), të lartë (e treta më e lartë në grupmoshën tuaj) ose mesatare (e treta e mesme). Ju e bëni testin përsëri pas gjashtë vjetësh. Me një korrelacion prej 0.70, është rreth 60 përqind probabilitet që të merrni të njëjtin reagim për çdo tipar të dhënë te ‘BigFive’ të dyja herët. Me fjalë të tjera, ju pritet të merrni të njëjtin rezultat për tre nga pesë tiparet. Përveç ndryshimit të vërtetë të tipareve, mund të merrni një rezultat të ndryshëm sepse testet e personalitetit nuk janë plotësisht të besueshme. Për shembull, edhe nëse e bëni testin përsëri javën e ardhshme dhe nivelet tuaja të tipareve janë ende të njëjta, rezultatet do të lidhen diku rreth 0.85, në varësi të sa i mirë ishte testi.
Të rinjtë kanë më shumë gjasa të ndryshojnë
Në moshën madhore të hershme, korrelacioni midis rezultateve të testit të marra me gjashtë vjet largësi është më i ulët, rreth 0,60. Për shembull, kur përfundoni një test në moshën 18 vjeç dhe përsëri në moshën 24 vjeç, ka më pak se 55% probabilitet që të merrni të njëjtin reagim për çdo tipar të dhënë te ‘BigFive’. Ndryshimi i tipareve të personalitetit ka edhe më shumë gjasa të ndodhë më herët në jetë. Rreth gjysma e adoleshentëve ndërrojnë pozicionet e tyre relative në çdo tipar të caktuar të personalitetit për disa vite – ndërrimi i pozicioneve në të paktën një nga tiparet e ‘BigFive’ është pothuajse i garantuar. Kjo do të thotë se tiparet e personalitetit të rinisë nuk lejojnë parashikime shumë të sakta të tipareve të personalitetit të tyre në moshë madhore.
Ndryshimi i tipareve të personalitetit është normal
Pra, personaliteti juaj ka shumë të ngjarë të ndryshojë brenda gjashtë viteve të ardhshme, veçanërisht nëse jeni i ri. Për shembull, shanset janë të paktën një në tre se reagimet që merrni për çdo tipar të dhënë te ‘Big Five’ të ndryshojnë. Duke parë të pesë tiparet njëkohësisht, ka shumë mundësi që reagimet të ndryshojnë për të paktën njërën prej tyre. Dhe ky është probabiliteti për të ndryshuar në gjashtë vjet. Gjatë periudhave më të gjata, ndryshimi i tipareve të personalitetit është edhe më i mundshëm.
Përgatiti K.I / Burimi psychologytoday.com
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
