Shpesh dëgjojmë se burrat dhe gratë duhet të martohen në moshë të hershme për të shmangur problemet në lindjen e fëmijëve. Mosha e duhur për martesë është një temë e diskutueshme. Disa besojnë se 20 vjeç është mosha e duhur për t’u martuar, ndërsa disa thonë se 30 vjeç është mosha perfekte për martesë.
Sipas Healthline, është vënë re një rënie e fertilitetit si te meshkujt ashtu edhe te femrat me moshën, dhe lindja e një fëmije më vonë në jetë mund të rrisë rrezikun për t’u përballur me komplikime në shtatzëni. Megjithatë, vetëm për shkak se jeni në të 30-at ose 40-at, nuk do të thotë se nuk mund të keni një fëmijë të shëndetshëm.
Mosha tipike për të lindur fëmijë
Sipas një raporti të Medical News Today, nuk ka moshë të duhur për të pasur një fëmijë. Zakonisht, gratë mund të kenë fëmijë nga adoleshenca deri në menopauzë. Nga ana tjetër, meshkujt mund të vazhdojnë të mbeten pjellorë deri në të 60-at apo edhe të 70-at e tyre.
Reduktimi i fertilitetit
Sipas një raporti të Shoqatës Amerikane për Mjekësinë Riprodhuese, gratë përjetojnë një ulje të lehtë të fertilitetit në fillim të të 30-ave. Fertiliteti ulet ndjeshëm ndërmjet moshës 35 dhe 45 vjeç. Raporti thotë më tej se një grua e shëndetshme 30-vjeçare ka gati 20 për qind shanse për shtatzëni çdo muaj. Deri në moshën 40 vjeç, kjo shifër ulet në më pak se 5 për qind për cikël. Nuk ka asnjë kufi fiks në lidhje me moshën për fertilitetin mashkullor. Megjithatë, ka një rënie të lehtë në cilësinë e spermës ndërsa meshkujt plaken.
Komplikimet mund të ndodhin pavarësisht nga mosha
Aftësia e një individi për të mbetur shtatzënë nuk varet vetëm nga mosha. Sipas Departamentit të Shëndetit dhe Shërbimeve Njerëzore të Shteteve të Bashkuara (HHS), 12-13 për qind e çifteve në Shtetet e Bashkuara përballen me probleme për të mbetur shtatzënë, pavarësisht nga mosha e tyre.
Pothuajse një e treta e rasteve të infertilitetit ndodhin për shkak të problemeve të fertilitetit tek gratë. Një e treta e rasteve të tilla shkaktohen nga problemet e fertilitetit tek meshkujt. Rastet e mbetura ndodhin për shkak të një kombinimi të çështjeve apo problemeve mashkullore dhe femërore që nuk mund të përcaktohen.
Nuk ka moshë perfekte për të pasur fëmijë
Ndërsa fertiliteti bie me kalimin e moshës, shumica e grave të shëndetshme janë biologjikisht të afta të kenë një fëmijë deri në menopauzë. Shumica e burrave të shëndetshëm mund të mbeten pjellorë deri në të 60-at dhe 70-at e tyre. Disa njerëz mund të jenë biologjikisht të gatshëm për të mbetur shtatzënë, por jo të përgatitur financiarisht ose emocionalisht për t’u kujdesur për fëmijën. Pra, duhet të merren parasysh të gjithë faktorët përpara se të vendosni të keni një fëmijë.
Përgatiti K.M / Burimi News18
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
