A mund të jetë vërtet i rrezikshëm sporti, ajo që bëjmë në shtëpi para televizorit apo duke dëgjuar radio? “Përgjigja është e gjerë dhe komplekse. Megjithatë, mund të themi me siguri se çdo person mund të kryejë një lloj aktiviteti fizik ose sportiv (këto janë dy aktivitete motorike krejtësisht të ndryshme) në siguri të plotë, padyshim duke kryer fillimisht kontrolle dhe vlerësime për të nxjerrë në pah cilët janë faktorët tuaj të rrezikut, familjariteti apo predispozita juaj për të zhvilluar probleme të caktuara”, shpjegoi Dr. Gaia De Giacomi, mjeke sportive.
Dallimet mes aktivitetit fizik dhe sportiv
Është mirë të bëhet një dallim i duhur midis aktiviteteve motorike. “Aktiviteti apo ushtrimi fizik synon ekskluzivisht mirëqenien e personit. Nëse kryhet rregullisht përmirëson funksionin kardiovaskular dhe të frymëmarrjes, zvogëlon faktorët e rrezikut në sëmundjet kardiovaskulare, zvogëlon sëmundshmërinë dhe vdekshmërinë, përmirëson funksionet njohëse, cilësinë e gjumit. zvogëlon ankthin dhe depresionin, përmirëson qëndrueshmërinë, fleksibilitetin, shpejtësinë, zhvillon ekuilibrin dhe koordinimin e mirë, pra përmirëson cilësinë e jetës. Përshkrimi i ushtrimeve fizike kryhet nga mjeku sportiv duke vlerësuar me kujdes karakteristikat e personit. Bëhet një ekzaminim kardiovaskular, një depistim i plotë kardiologjik në kushte pushimi dhe stresi dhe merret parasysh niveli i stërvitjes apo mosstërvitjes së personit, për të përshkruar një program ushtrimesh të individualizuar”. Ndryshe është rasti kur bëhet fjalë për aktivitetin sportiv: “Aktiviteti sportiv nuk synon vetëm mirëqenien e njeriut, por ushqen brenda vetes një komponent konkurrues që nuk është ideal për të gjithë njerëzit”.
Para fillimit të një aktiviteti fizik
Nëse vendosni të ndërmerrni një aktivitet fizik për të përmirësuar gjendjen tuaj të mirëqenies, dhe jo sepse dëshironi të merrni pjesë në Lojërat Olimpike, ka disa hapa që duhet të ndërmerrni për t’u siguruar që të mos e teproni dhe të mos rrezikoni. “Ne mendojmë për ata që duan të regjistrohen në palestër ose të ndjekin kurse Pilates ose gjimnastikë të butë. Në këto raste bëhet gjithmonë një vlerësim i përgjithshëm që përfshin një anamnezë të kujdesshme familjare dhe personale (shoqërore, simptoma në pushim dhe / ose nga sforcimet, problemet e mëparshme klinike), testet kimike të gjakut, një ekzaminim fizik kardiovaskular, një vlerësim bazë antropometrik, një ekzaminim i plotë kardiologjik bazal dhe nën stres, një vlerësim i sistemit muskuloskeletor dhe vlerësimi i mundshëm spirometrik pulmonar, teste të syrit dhe urinës”. Kryerja e kësaj lloj vizite ju lejon t’i qaseni çdo aktiviteti fizik në mënyrë të qetë dhe paqësore. “Dhe nëse personi është i interesuar të kryejë një aktivitet fizik që kërkon një angazhim veçanërisht të moderuar ose të rëndësishëm nga pikëpamja kardiovaskulare, rekomandohet kryerja e një testi ergometrik maksimal dhe vlerësim kardiopulmonar për të vlerësuar si sistemin kardiovaskular nën sforcim ashtu edhe aktivitetin e ventilimit pulmonar nën ushtrim”.
Çfarë duhet të keni kujdes kur luani sport
Ka shenja që na bëjnë të kuptojmë nëse po e ekzagjerojmë, nëse po ia nënshtrojmë trupin tonë një stresi shumë të lartë dhe që duhet t’i kushtojmë gjithmonë pak vëmendje. “Gjatë aktivitetit fizik duhet t’i kushtojmë gjithmonë vëmendje disa gjërave: për shembull nëse mund të flasim nuk duhet të kemi gulçim. Le të përpiqemi të vërejmë nëse kemi dhimbje shtypëse retrosternale, rrahje të zemrës apo nëse zemra rreh në mënyrë të parregullt, dhe nëse këto ndjesi vazhdojnë edhe nëse jemi duke bërë ushtrime me intensitet të ulët. Të gjitha këto sinjale mund të jenë kambana alarmi për t’u hetuar me mjekun tuaj”. “Duhet të respektoni gjithmonë trupin tuaj dhe gjithashtu nivelin tuaj të stërvitjes, pa e tepruar”.
Çfarë lloj sporti të zgjidhni
Për të zgjedhur sportin më të përshtatshëm duhen respektuar dy kushte: nga njëra anë të kënaqim shijet dhe pasionet tona dhe nga ana tjetër të kemi parasysh mundësitë dhe mbi të gjitha limitet tona. “Duhet të vlerësoni karakteristikat tuaja muskuloskeletore dhe kardiovaskulare. Njerëzit që kanë probleme me zemrën, që kanë pasur ngjarje ishemike duhet të drejtohen drejt aktiviteteve që kanë një angazhim të lehtë ose të moderuar kardiovaskular”. Nëse strukturohet duke vlerësuar karakteristikat e personit, aktiviteti motorik sigurisht që mund të sjellë një mirëqenie të madhe si të natyrës fizike ashtu edhe konjitive. “Pra, sporti është i mirë për ju, por jo të gjitha sportet janë të mira për të gjithë njerëzit. Disa sporte, nëse kryhen në mënyrë të pakontrolluar ose të tepruar, mund të përfshijnë rreziqe për shëndetin. Jo vetëm për sistemin kardiovaskular, por edhe për trupin dhe sistemin muskuloskeletor nëse nuk ka asnjë përgatitje në këtë drejtim. Për këtë arsye, përpara se të angazhoheni në ndonjë aktivitet, këshillohet të konsultoheni gjithmonë me mjekun sportiv i cili do të përcaktojë, në bazë të një vlerësimi të saktë klinik, vëllimet, intensitetin dhe shpeshtësinë e çdo aktiviteti fizik që synon mirëqenien”.
Burimi / https://www.fanpage.it/
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
