Sipas António Guterres, sekretarit të përgjithshëm të OKB-së, lufta në Ukrainë dhe kriza klimatike janë një “stuhi e përsosur që vetëm sa po rrit hendekun midis Veriut dhe Jugut të botës, e cila nga ana tjetër është moralisht e papranueshme dhe e rrezikshme”. Sipas sekretarit të përgjithshëm të OKB-së Guterres, deklaruar për gazetën britanike The Guardian, ky hendek nuk është vetëm “moralisht i papranueshëm”, por i rrezikshëm dhe kërcënon më tej paqen dhe sigurinë në një botë që tashmë po lufton me konflikte të shumta.
Krizat globale të ushqimit, energjisë dhe financiare të nisura nga lufta në Ukrainë kanë prekur vendet tashmë të tronditura nga pandemia dhe kriza klimatike, duke përmbysur atë që kishte qenë një konvergjencë në rritje midis vendeve të zhvilluara dhe atyre në zhvillim, vazhdoi Guterres, i cili theksoi se për momentin shqetësimi më i madh është pikërisht zgjerimi i hendekut mes të pasurve dhe të varfërve.
“Të gjitha këto kriza po kontribuojnë në rritjen dramatike të pabarazisë në botë dhe në një përkeqësim serioz të kushteve të jetesës së popullatave më të cenueshme”. Mbi të gjitha, Guterres e shqetëson më shumë çështja e klimës: “Ne duhet të bëjmë gjithçka që është e mundur për ta rikthyer çështjen klimatike në qendër të axhendës sonë kolektive. Më shumë se planeti, janë speciet njerëzore që janë në rrezik. Diçka po bëhet, por është shumë pak, shumë vonë. Ne duhet të shkurtojmë emetimet sa më shpejt të jetë e mundur.”
Lufta në Ukrainë e ka përkeqësuar këtë skenar. Gjermania, për shembull, e cila është shumë e varur nga gazi rus, njoftoi se do të rihapë stacionet jashtë shërbimit me qymyr për të ruajtur furnizimet e saj, pas kufizimeve në rrjedhat e gazit të Rusisë. E njëjta gjë është bërë e ditur nga Franca, e cila ka sinjalizuar se mund të rihapë një stacion qymyri për shkak të krizës në Ukrainë, pavarësisht angazhimit të të gjithëve për të hequr gradualisht të gjitha impiantet e qymyrit deri në vitin 2030.
Lufta, shpjegoi Guterres, theksoi varësinë tonë nga lëndët djegëse fosile. “Kjo po krijon ndikime dramatike në rritjen e çmimeve të energjisë dhe po kontribuon në rritjen e çmimeve të ushqimeve dhe situatës jashtëzakonisht të vështirë financiare të shumë vendeve në zhvillim. Nëse bota do të kishte investuar më shumë, siç duhej të ishte bërë në ‘dekadën e fundit në burimet e rinovueshme, sot do të ishim në një situatë krejtësisht tjetër”, shtoi ai.
Përgatiti O.T / Burimi Fanpage.it
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
