Gjëja e fundit që një prind dëshiron të shohë është kur dikush i qorton fëmijën. Kjo ju bën të tërboheni dhe ekziston një arsye pse ndodh kështu.
Ai sinjalizon pjesën e lashtë reptiliane të trurit se rreziku është i pranishëm. Sidoqoftë, është e rëndësishme të ruani qetësinë dhe ta trajtoni situatën me edukatë.
“Bright Side” tregon 8 hapa që duhet të ndërmerrni kur dikush qorton fëmijën tuaj.
- Tregojini se jeni aty
Nëse ju e përfshini veten në situatën e krijuar, çdo gjë mund të ndryshojë. Fëmija juaj do të ndihet i sigurt dhe i mbrojtur.
- Vlerësoni situatën para se të reagoni
Zemërimi nuk është kurrë një zgjidhje, prandaj është thelbësore që të qetësoheni dhe ta trajtoni situatën në mënyrë logjike. Merrni frymë dhe mblidhni informacione për të gjithë ngjarjen. Është krejtësisht e mundur që fëmija juaj të ketë gabuar: të ketë goditur një fëmijë tjetër, të ketë thyer pronën e dikujt, të jetë sjellë keq në klasë, etj.
Duhet të merrni parasysh atë që do të kishit bërë ju nëse do të ishit në vend të prindit tjetër.
- Tregojini fëmijës se arrini ta kuptoni
E gjithë situata mund ta bëjë fëmijën të ndihet i çorientuar ose i frikësuar. Është e rëndësishme të jeni të durueshëm me fëmijën tuaj dhe t’i tregoni se e keni kuptuar. Uluni në gjunjë për t’i parë drejt e në sy dhe kërkoni që ata të shpjegohen. Ndaloni së gjykuari dhe dëgjoni interpretimin e ngjarjes nga ata.
Nëse fëmija e sheh që ju e kuptoni, ka më shumë të ngjarë ta kuptojë atë që keni për t’i thënë dhe të rishqyrtojë sjelljen e tij në të ardhmen.
- Jini të drejtpërdrejtë me personin tjetër
Të qenit i drejtpërdrejtë me dikë shpesh është sinonim i të qenit i pasjellshëm dhe i pakujdesshëm. Por nëse nuk veproni kështu do të bëni më shumë dëm sesa mirë.
Jini të sinqertë me personin tjetër. Me mirësjellje informojini ata se disiplinimi i fëmijës tuaj është shqetësimi që keni dhe se do ta vlerësonit nëse ai nuk përfshihet në situatë. Ju gjithashtu mund të sugjeroni që ata të mendojnë se si do të vepronin nëse do të ishin në vendin tuaj.
- Përdorni humorin
Nëse shihni se biseda shkon keq, gjëja e fundit për të cilën mendoni është të bëni shaka. Por humori ka një kapacitet të madh për të ndryshuar situata të vështira. Një shaka e lehtë mund t’i bëjë njerëzit të ndihen më të afërt me ju. Ai gjithashtu mund ta bëjë situatën të mos duket shumë serioze.
Sigurisht, duhet të jeni të kujdesshëm me shakatë specifike që bëni. Disa mund të shihen si sarkastike dhe nënçmuese, dhe padyshim që mund t’i bëjë gjërat më keq.
- Vendosni kufij
Nëse personi që po qorton fëmijën është një figurë autoritare (mësuesi i shkollës, trajneri, i afërmi), është e rëndësishme të vendosni kufij për të parandaluar situata të ngjashme. Kështu, ju po krijoni një pamje të qëndrueshme në sytë e fëmijës suaj për atë që është e drejtë dhe e gabuar dhe si ndëshkohen veprat e gabuara.
- Shpjegojini situatën fëmijës tuaj
Mënyra se si i perceptoni gabimet mund të ketë efekte afatgjata në mënyrën se si fëmija juaj përballet me gabimet dhe pengesat në jetën e tij. Ngushëlloni fëmijën tuaj, por bëni kujdes që ai të mos mendojë se ju vjen keq për të. Në vend të kësaj, qëndroni të vendosur dhe shpjegoni me qetësi pse ato veprime janë të padëshirueshme.
Si prind, është detyra juaj t’i mësoni fëmijët të respektojnë dhe të sillen sipas normave të pranuara shoqërore. Ata duhet ta njohin veten si pjesë e një komuniteti (klasë, ekip sportiv, shesh lojërash) dhe të kuptojnë se ka njerëz përgjegjës për këto grupe. Kështu, për shembull, kur fëmija juaj sillet keq në klasë, mësuesi ka të drejtë ta qortojë dhe të tregojë pse këto lloj veprimesh janë të padëshirueshme.
Sidoqoftë, trajtimi i fëmijëve me zemërim ka pasoja serioze. Të bërtiturat ndaj një fëmije mund të ulë vetëvlerësimin e tyre dhe të nxisë ankthin.
Burimi / Panorama Online
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
