Studiuesit e përkufizojnë përulësinë intelektuale, më thjesht, si “shkallën në të cilën njerëzit e kuptojnë se besimet e tyre mund të jenë të gabuara”. Përfshin të diturit se njohuritë tuaja janë vetëm të pjesshme dhe se besimet dhe opinionet tuaja janë të gabueshme për shkak të paragjykimeve tuaja psikologjike dhe sepse provat që i mbështesin ato mund të jenë të kufizuara ose me të meta.
“Sigurisht, rrallëherë duket sikur besimet tona janë të gabuara dhe zakonisht duhet të sillemi sikur besimet tona të jenë të vërteta ose përndryshe do të paralizohemi nga pasiguria”, shkruan studiuesi Mark Leary. “Por njerëzit që janë të lartë në përulësi intelektuale mbajnë parasysh se çdo gjë që ata besojnë se është e vërtetë mund të jetë e gabuar dhe, kështu, ata mund të kenë nevojë të rishikojnë pikëpamjet e tyre në çdo kohë.”
Sipas një prej studimeve të Leary, njerëzit me përulësi intelektuale janë shumë të shqetësuar me cilësinë e provave për opinionet. Një studim tjetër sugjeron që njerëzit intelektualisht të përulur do të shpenzojnë më shumë përpjekje duke lexuar rreth pikëpamjeve të kundërta me të tyret, dhe ata janë shumë më të interesuar të kuptojnë pse njerëzit mund të mos pajtohen me to. Njerëzit që janë të lartë në përulësi intelektuale shënojnë më shumë kuriozitet epistemik, i cili është motivimi për të ndjekur njohuri dhe ide të reja.
Është e rëndësishme të theksohet se përulësia intelektuale është vetëm një formë e përulësisë. Përulësia në përgjithësi përfshin një aftësi për të parë kufizimet tuaja, si dhe pikat tuaja të forta dhe për të pasur një këndvështrim të saktë mbi rëndësinë tuaj relative në botë. Forma të tjera të përulësisë përfshijnë përulësinë kulturore, e cila fillon me pranimin e paragjykimeve të krijuara nga prejardhja dhe përvojat tona; gjithashtu mund të jemi të përulur për aftësitë tona. Përulësia intelektuale është forma e përulësisë që përqendrohet në njohuritë, besimet, opinionet dhe inteligjencën tonë.
Revista Psikologjia
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
