Chris Rock mund ose nuk mund të zgjedhë të flasë publikisht për momentin dramatik që ndodhi në Oscars, kur Will Smith u ngjit në skenë dhe e goditi atë në fytyrë, pasi Rock bëri një shaka për gruan e Smith, Jada Pinkett Smith.
Ndërsa Rock ende nuk ka komentuar publikisht, incidenti po tërheq vëmendjen e komenteve që Rock bëri së fundmi se si një grindje në fëmijëri e bëri atë të kujdesshëm ndaj konfrontimit.
“Në fëmijërinë time, unë u ngacmova në mënyrë qesharake”, tha ai në janar në podcast “Fly on the Wall with Dana Carvey and David Spade”. “Gjysma e ngacmimeve ishte sepse unë isha thjesht një djalë i vogël, shkoja me autobus për në shkollë dhe isha i zi”.
Rock, 57 vjeç, tha se ngacmimi “i ashpër” i dha atij një “ndjenjë të çuditshme” dhe ndau një anekdotë për një incident të dhunshëm nga rinia e tij.
“Një ditë, një djalë më shtyu në një festë dhe më gjuajti me rërë në fytyrë para vajzave”, tha ai. Rock tha se ai shkoi në shtëpi dhe vendosi një tullë në një çantë librash, më pas u kthye në festë dhe ia hodhi atë në fytyrë djalit që po e ngacmonte. Djali u plagos rëndë “deri në pikën që menduam se mund të vdiste”, tha Rock.
Shkurtimisht, që nga ajo ditë, “Kam pasur frikë të zemërohem”, vazhdoi ai. “Isha shumë i frikësuar nga zemërimi im”. Ai gjithashtu tha se përmes terapisë mësoi se kishte aq frikë të lëshonte ndjenjat e tij të zemëruara saqë “e la të gjithë botën të ecë mbi të”.
Kohët e fundit, megjithatë, humoristi thotë se ka bërë përparim në shprehjen e ndjenjave të tij në mënyrë konstruktive. Në vitin 2020, Rock tha se ai ka ndjekur shtatë orë terapi në javë, ku ai ka punuar mbi emocionet e tij dhe një diagnozë të çrregullimit të të mësuarit joverbal.
“Tani, vitin e fundit mund të zemërohem. Nuk kam frikë t’u bëj të ditur njerëzve se si ndihem për disa gjëra”, tha ai. “Kështu që tani, mund t’ju them: “Hej, nuk më pëlqeu ajo që më thatë… pa humbur toruan”.
Një ditë pas Oscars, Smith publikoi në Instagram një falje për incidentin.
“Unë dua të kërkoj falje publike, Chris”, shkroi ai. “Më kishte dalë vetja nga kontrolli dhe gabova. Ndihem në siklet dhe veprimet e mia nuk ishin tregues i mashkullit që dua të jem. Nuk ka vend për dhunë në një botë dashurie dhe mirësie”.
Burimi / https://www.today.com/
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
