Për shumë njerëz, vera është stina e gëzimit, pushimeve, dritës dhe aktiviteteve në natyrë. Megjithatë, jo të gjithë e përjetojnë këtë stinë me entuziazëm. Ka individë për të cilët vera përfaqëson një periudhë të vështirë, të mbushur me ndjesi mbylljeje, trishtimi dhe lodhjeje emocionale. Ky fenomen njihet si depresioni veror ose depresioni sezonal i verës, një formë më pak e njohur e çrregullimit afektiv sezonal.
Depresioni sezonal është një gjendje psikologjike që shfaqet në lidhje me ndryshimet stinore. Ndërkohë që shumica e rasteve ndodhin në vjeshtë ose dimër, një pjesë më e vogël e popullsisë përjeton shenjat e depresionit në verë. Ky çrregullim shpesh nis në fund të pranverës ose në fillim të verës dhe largohet në vjeshtë. Simptomat më të zakonshme përfshijnë: Trishtim i zgjatur dhe pa shkak të qartë; Humbje interesi për aktivitetet e zakonshme; Mbyllje në vetvete dhe izolim social; Irritim dhe ankth të shtuar; Vështirësi në gjumë (pagjumësi); Mungesë oreksi dhe humbje në peshë; Ndjenjë pamjaftueshmërie dhe vetëvlerësim i ulët.
Pse ndodh depresioni gjatë verës?
Shkaktarët e depresionit veror janë të shumëfishtë dhe mund të lidhen me ndryshimet në orarin biologjik. Ditët më të gjata dhe ekspozimi i tepërt ndaj dritës së diellit mund të çrregullojnë ritmet cirkadiane të trupit; Presioni social për të qenë i lumtur. Vera shpesh shihet si një periudhë “ku gjithçka duhet të jetë perfekte”, çka mund të rrisë ndjesinë e pamjaftueshmërisë tek ata që nuk e përjetojnë në të njëjtën mënyrë. Ndodh gjithashtu nga ndryshimet në rutinë. Pushimet, largimet nga puna apo shkolla, dhe mungesa e strukturës mund të krijojnë ndjenjë boshllëku dhe destabilizimi emocional. Por depresion mund të shkaktojë edhe ndjeshmëria ndaj nxehtësisë dhe lagështirës. Disa njerëz ndihen të irrituar, të lodhur dhe pa energji për shkak të kushteve klimatike ekstreme.
Si mund të ndihmojmë veten ose të tjerët?
Mos e nënvlerësoni ndjesinë – Ndjenjat negative gjatë verës nuk janë “çudi” dhe nuk duhet të trajtohen me indiferencë apo përçmim.
Kërkoni ndihmë profesionale – Një psikolog apo psikiatër mund të ndihmojë në identifikimin dhe trajtimin e depresionit veror.
Ruani një rutinë të qëndrueshme – Mbajtja e një orari të rregullt gjumi, ushqimi dhe aktivitetesh ndihmon në balancimin emocional.
Shmangni presionin për të qenë “gjithmonë mirë” – Pranimi i ndjenjave reale është më i shëndetshëm sesa përpjekja për t’i fshehur ato.
Kërkoni lidhje sociale të shëndetshme – Edhe pse mund të jetë e vështirë, mbajtja e kontakteve me njerëz të afërt mund të ndihmojë në ndalimin e izolimit.
Në përmbyllje, depresioni i verës është real dhe meriton vëmendje po aq sa çdo formë tjetër e çrregullimeve emocionale. Në një shoqëri që shpesh glorifikon stinën e verës si kohën e “lumturisë së detyrueshme”, është e rëndësishme të kuptojmë se çdo individ e përjeton këtë periudhë në mënyrën e vet. Ndihma është gjithmonë e mundur, dhe kërkimi i saj është një akt i guximshëm dhe i domosdoshëm.
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
