Kanceri i gjirit është një ndër diagnozat më të shpeshta dhe një ndër sëmundjet që shkakton më shumë tronditje emocionale tek gratë. Përveç sfidës mjekësore, ai mbart një barrë të rëndë psikologjike, duke ndikuar jo vetëm tek trupi, por edhe tek identiteti, vetëbesimi dhe marrëdhëniet ndërpersonale. Si profesionist, është thelbësore të kuptojmë se shëndeti mendor nuk është thjesht një aspekt shtesë i trajtimit, por një pjesë e pandashme e procesit shërues.
Diagnoza, një moment që ndryshon jetën
Marrja e diagnozës me kancer gjiri shpesh përjetohet si një “tërmet” emocional. Gruaja përballet me frikën e humbjes së jetës, pasiguritë për trajtimet e ardhshme dhe shqetësimet për familjen e saj. Shumë paciente përshkruajnë këtë fazë si një gjendje tronditjeje, ku mendimet janë të mjegullta dhe emocionet përplasen mes shpresës dhe dëshpërimit. Ky moment është kritik: mënyra se si përçohet lajmi, mbështetja që ofrohet dhe pranimi i realitetit ndikojnë në mënyrën se si gruaja do të përballet me të gjithë rrugëtimin e trajtimit.
Trupi dhe imazhi i vetvetes
Trajtimet mjekësore si mastektomia, kimioterapia dhe radioterapia nuk lënë gjurmë vetëm fizike, por prekin thellësisht edhe imazhin trupor. Humbja e flokëve, ndryshimet në lëkurë, heqja e gjirit apo shenjat e ndërhyrjeve kirurgjikale bëhen shpesh burim dhimbjeje emocionale dhe turpi. Shumë gra raportojnë ndjesinë se “nuk janë më të njëjtat” ose se feminiteti i tyre është cenuar. Këto përvoja ndikojnë drejtpërdrejt tek vetëbesimi dhe tek mënyra se si ato e shohin veten në marrëdhëniet intime dhe sociale.
Emocionet e fshehura pas trajtimit
Ndërsa fokusi i familjes dhe i mjekëve shpesh është tek shërimi fizik, dimensioni emocional mund të mbetet në hije. Megjithatë, ankthi, depresioni, ndjenja e izolimit dhe frika e rikthimit të sëmundjes janë përvoja të zakonshme. Është e rëndësishme të pranojmë se pas çdo buzëqeshjeje të forcës, mund të fshihet një betejë e brendshme. Psikologu klinik ka rolin të krijojë hapësirën e sigurt ku pacientja mund të shprehë këto emocione pa gjykim dhe të ndiejë se nuk është e vetme.
Roli i mbështetjes psikologjike
Psikoterapia individuale ndihmon gruan të përballojë ankthin, të rrisë qëndrueshmërinë dhe të rindërtojë identitetin e saj. Terapia në grup ofron ndjenjën e solidaritetit dhe ul izolimin, duke krijuar një rrjet mbështetës ku ndarjet e përvojave bëhen burim force. Mbështetja e familjes është po aq e rëndësishme, pasi edhe partnerët, fëmijët apo prindërit përjetojnë ankth dhe frikë që shpesh nuk shprehen hapur.
Strategji për përballim
-Teknikat e relaksimit dhe frymëmarrjes për të reduktuar stresin.
-Mbajtja e një ditari emocional për të shprehur mendime dhe ndjenja.
-Ushtrime të imagjinatës pozitive për të rritur shpresën.
-Përcaktimi i qëllimeve të vogla të përditshme për të rikthyer ndjenjën e kontrollit.
-Përfshirja në aktivitete sociale dhe hobi që rikthejnë gëzimin dhe normalitetin.
Pas trajtimit, rruga e rikthimit
Edhe pasi trajtimet mjekësore përfundojnë, frika e rikthimit të sëmundjes shpesh vazhdon. Periudha e “rikthimit në normalitet” është paradoksale: të gjithë presin që pacientja të ndihet mirë, por ajo shpesh përballet me një boshllëk emocional dhe pyetje të reja për jetën. Është këtu ku mbështetja psikologjike luan një rol kyç, të ndihmojë gruan të ndërtojë një identitet të ri pas kancerit, të integrojë përvojën dhe të shohë të ardhmen me shpresë.
Mesazhi përfundimtar
Kanceri i gjirit nuk është vetëm një sëmundje e trupit, ai prek gjithë qenien, mendjen, emocionet dhe shpirtin. Mbështetja psikologjike nuk është luks, por një domosdoshmëri. Ajo i jep gruas forcën për të përballuar sfidën, për të rigjetur veten dhe për të rindërtuar jetën me më shumë qëndrueshmëri dhe kuptim. Si profesionistë të shëndetit mendor, ne kemi detyrën të jemi pranë grave në këtë rrugëtim, jo vetëm për të ulur dhimbjen emocionale, por për të nxitur shpresën dhe për të dëshmuar se përtej diagnozës, ekziston gjithmonë jeta.
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
