Nga Prof.Assoc.proc.Doc.Dr. Ilia S.LARTI
Poetja Adelina Pali sot po përcjell librin e dytë me poezi “Fole Mirësie”. Ky libër sa më ra në dorë e lexova gjithë vëmendje, duke më bërë për vete, nëpërmjet përjetimit të mjaft emocioneve me ndjesi e shije mjaft të bukura, për jetën, ku autorja e shpreh qartë nëpërmjet vjershës “Filli i jetës”.
Nuk dua që fillin brenda vetes unë ta humb…!
…
S’më ka ikur akoma filli, se atë ma mbulon mirësia,
Unë e përkëdhel jetën ashtu dalëngadalë dhe ëmbël.
…
Autorja e librit me poezi, shpreh ndjenjat e saj lirike plot frymëzim dhe vërtetësi. Ajo ligjëron me gjuhën e gjetheve dhe buitjen e luleve të cilat çelin e lëshojnë aromë sa të këndshme dhe dehëse, e midis kësaj mrekullie, lodrojnë dallëndyshet, që bëjnë prezent pranverën.
Këtë libër me poezi autorja e përcjell nëpërmjet…një vargu mjaft bukur:
Ato vijnë aq ngrohtë aq ëmbël tek unë….
Poezitë e poetes Adelinës përbëjnë hartën e shpirtit të saj, brenda një kornize plot vezullim. Çdo poezi, si pjesë e hartës adeliane, ka ngjyrën e saj plot nuancë që të bën për vete dhe të motivon ta lexosh çdo poezi disa herë, nën tingujt e një kënge plot ndjenja e emocion ku në thellësi të saj dëgjohen tik-taket e zemrës dhe frymarrjen e shpirtit që gjallon plot jetë, të cilat e bëjnë poeten shumë vitale që di të ledhatoj gjithë ëmbëlsi, frymë e dashuri njerëzore dhe që mban e ushqen shpresë plot vlera dhe jetë optimiste dhe gjithë shkëlqim.
Poete Adelinën e gjen prezent kudo me kontributet e saj, sa humane dhe sociale. Pa kushte dhe interes….! Ja si e shpreh me vargje këtë angazhim poete Adelina:
Dhe ja ku jam…!
Si një ujvarë….!
Ku mendimet e mija s’rreshtin kurrë…!
Brenda jetës sime përpiqem të thur një fole,
Po, folenë e bukur të jetës dhe mirësisë…
Ku shpirti dhe qënia ime të gjejë qetësi…
Po, unë në qiell ngre si shpëtimtare dashurinë….
Ja kjo është Poete Delina Pali!
I uroj suksese në jetë dhe si krijuese në zhanrin e poezisë.
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
