Sipas një studimi të ri, stresi psikologjik mund të rrisë rrezikun e zhvillimit të artritit, problemeve me zemrën dhe mushkëritë. Edhe në nivele të ulëta, ai është një faktor rreziku potencial në zhvillimin e gjendjeve si sëmundja pulmonare obstruktive kronike. Shkencëtarët nga “Southampton General Hospital” arritën në këtë përfundim pasi analizuan të dhënat e më shumë se 16 mijë britanikëve.
Krahasuar me njerëzit që nuk shfaqnin simptoma të stresit, shanset për zhvillimin e artritit ishin 57% më të larta tek ata me nivele të ulëta të stresit psikologjik. Rreziku rritet me 72% për ata me nivele të moderuara të stresit dhe 110% për personat me nivele të larta të stresit, ka zbuluar studimi.
“Rezultatet tregojnë se edhe nivelet e ulëta të stresit rrisin rrezikun e zhvillimit të sëmundjeve kronike”, thotë prof. Catharine Gale.
“Prandaj është e nevojshme ndërhyrja për të lehtësuar simptomat e ankthit dhe depresionit, për të parandaluar zhvillimin e këtyre sëmundjeve tek pacientët”.
Burimi / shendeti.com.al
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
