Fëmijët e prindërve të divorcuar kanë më shumë të ngjarë të gënjejnë dhe mashtrojnë sepse që në moshë të re janë të ekspozuar ndaj sjelljeve manipuluese, sipas një studimi.
Studiuesit kërkuan nga 793 nxënës kopshtesh të moshës mes pesë dhe gjashtë vjeç që të zgjidhnin një monedhë në një zonë të vogël të mbyllur nga një perde, me njërën anë të medaljes së zezë dhe tjetrën të bardhë. Fëmijës iu tha që nëse rezultati ishte i bardhë ata do të merrnin ëmbëlsira si shpërblim, por nuk do të merrnin asgjë nëse do të ishte e zezë.
Ata zbuluan se 32% e fëmijëve të prindërve që nuk ishin të divorcuar që kishin një shans për të mashtruar e shfrytëzuan atë në krahasim me 56% të atyre me prindër të divorcuar.
Autorët kanë shkruar: “Fëmijët e prindërve të divorcuar kanë më shumë të ngjarë të ekspozohen ndaj sjelljeve manipuluese të njërit prind ndaj tjetrit dhe për të brendësuar se gënjeshtra është e pranueshme nëse ndihmon në promovimin e interesave të tyre. Gjithashtu, fëmijët e prindërve të divorcuar shpesh ndjehen të lënduar dhe fajtorë për shkaktimin e ndarjes së prindërve të tyre dhe gënjeshtra i ndihmon ata të ikin nga realiteti i hidhur në një botë imagjinare më pak të dhimbshme. Ata gjithashtu mund të mendojnë se meritojnë kompensim për fatkeqësinë e tyre, siç janë ëmbëlsirat e premtuara në eksperiment.“
Studimi i botuar në Journal Of Economic Behaviour and Organisation, gjithashtu pohoi se këshillimi psikologjik ndihmon në përmirësimin e ndershmërisë midis fëmijëve të prindërve të divorcuar, por nuk arrin ta bëjë këtë në mesin e fëmijëve të prindërve jo të divorcuar.
Autorët argumentojnë se këshillimi mbështetës mund të trajtojë në mënyrë efektive shkaqet e gënjeshtrës tek fëmijët e prindërve të divorcuar duke rikthyer vetëvlerësimin e tyre dhe lehtësuar frikën e braktisjes.
Burimi / https://www.dailymail.co.uk
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
