Pranvera e këtij viti do të shënojë fundin e pandemisë së koronavirusit. Dobësimi i valës “Omicron”, ka filluar të ndihet, dhe më e dukshme do të jetë në mars. Por vendimi për shpalljen e endemisë nuk është më çështje e mjekësisë. “Pandemia nis gjithmonë me një problem, me një patogjen, por mbaron gjithmonë si një normë sociale dhe politike”, thotë epidemiologu Ilir Alimehmeti.
“Mendoj që në pranverë, shumë nga shtetet, por edhe OBSH-ja mund të caktojë të deklasifikojë situatën jashtë fazës akute. Patjetër do të kemi raste dhe vatra. Fundin do e prekim që në mars, se ne po shohim që shifrat po bien që në shkurt”.
Për epidemiologun Alimehmeti, Shqipëria duhet të heqë edhe zyrtarisht masat anti-Covid, vendim që po e shqyrtojnë të gjitha shtetet. “Qartësisht asnjë shtet nuk e ndalon dot transmetimin e këtij virusi. Dielli nuk mbulohet me shoshë, prandaj masat qartësisht nuk kanë vlerë, por bëjnë dëm nga ana sociale dhe ekonomike”, thotë ai.
Specialistët thonë se Sars-Cov-2 nuk do të zhduket edhe për disa kohë, por imuniteti natyral dhe ai përmes vaksinës, ndihmojnë që sëmundja të kalohet më lehtë. Edhe pse nuk ka të dhëna të sakta, mjekët thonë së një pjesë e madhe e popullsisë tashmë e kanë kaluar sëmundjen më shumë se një herë, ndërsa mbi 42% e popullsisë në rang vendi është e vaksinuar me dy doza të vaksinës anti-Covid.
Burimi / https://a2news.com/
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
