Në muajin 18 Tetor të vitit 2017, emisioni “Stop” transmetoi historinë e Ajet Patozit. Për shkak të një sëmundjeje të rëndë, bashkëshortja e tij ndërroi jetë. Por si të mos mjaftonte kjo dhimbje për Ajetin, vjehrrit e tij i morën djalin 3-vjeçar, Aleksandros, duke mos e lejuar më ta takonte.
Gjykata e Rrethit Gjyqësor Berat, me gjyqtare Matilda Llangozin, pasi e shtyu 28 herë seancën gjyqësore, vendosi që foshnja të qëndronte me gjyshërit nga nëna, Kujtim dhe Drita Tana, duke u bazuar në interesin më të lartë të fëmijës. Gjithashtu vendosi që i ati ta takojë fëmijën e tij të dielën e parë të çdo muaji nga ora 10:00 deri në orën 15:00, në prezencën e gjyshit Kujtim Tana.
Ndërsa Gjykata e Apelit Vlorë e hodhi poshtë këtë vendim dhe vendosi që fëmija t’i kthehet të atit për rritje dhe edukim, duke u bazuar në raportin e psikologëve, por edhe në atë çfarë parashikon ligji i Republikës së Shqipërisë.
Por gjyshërit e Aleksandrosit kërkuan pezullimin e ekzekutimit të këtij vendimi në Gjykatën e Lartë. Në lidhje me këtë, avokati i Ajet Patozit u shpreh: “Për ironi të fatit dhe për keqinterpretim të ligjit nga ana e Gjykatës së Lartë, është pranuar kjo kërkesë”.
Më 4 Tetor 2018, Gjykata e Lartë vendosi pezullimin e ekzekutimit të vendimit të Gjykatës së Apelit Vlorë, duke ia rikthyer të drejtën e kujdestarisë gjyshërve Kujtim dhe Drita Tana.
Emisioni ”Stop” siguroi vlerësimet e psikologëve, të cilat kanë vënë re fenomene të rrezikshme në sjelljen e gjyshërve karshi 4-vjeçarit. Ekspertët vërejnë se Aleksandrosi po konsiderohet dhe trajtohet si vajza e vdekur e tyre, duke dëmtuar fëmijën.
Psikologia 1 – Aleksandro ka nevojë emergjente të lëvizë nga ai ambient. Aleksandro, përveç që ka përjetuar humbjen e nënës, një figurë shumë të rëndësishme dhe Aleksandro ka qenë në një moshë shumë të vogël, pavarësisht moshës sigurisht që ai e ka ndjerë këtë dhimbje, e ka përjetuar traumën në mënyrën e vet. Pjesa tjetër është që Aleksandros i është mohuar babai dhe nuk i është lejuar të ketë marrëdhënie vetjake me një figurë tjetër të rëndësishme, siç je ti.
Djali ka një frenim shumë të madh emocional. Tek pjesa, sa mbaj mend, më ka mbetur pjesa që e thërrisnin Ajlin… pra që gjatë gjithë kohës, qoftë gjyshja apo qoftë edhe gjyshi, shihnin ose mishëronin tek djali, vajzën e tyre. Në konceptin e tyre, ata nuk mundet dot ta pranojnë që Aleksandro është fëmijë i yti dhe i vajzës së tyre.
Ajet Patozi – I vajzës, po!
Psikologia 1 – Ata për mua, Aleksandron vazhdojnë ta shohin si një lloj objekti që u përket atyre, duke të anashkaluar fare.
Ajet Patozi – Po, po!
Psikologia 1 – Kemi një gjysh që është shumë protektiv dhe me tipare agresive. Aleksandro nuk është lejuar që të shprehë emocionet. Duke pasur një figurë gjatë gjithë kohës kaq protektive, kaq agresive, që ti do bësh si të them unë, këtu jam unë, këtu është “babo”, që në fakt është gjyshi.
Ajet Patozi – Po!
Psikologia 1 – Dhe ashtu sikurse e kam cituar dhe në raport, Aleksandro nuk ka nevojë, përveç fatkeqësisë që i humbi nëna, por Aleksandri ka një baba… duhet të rritet me modelin e familjes.
Ajet Patozi – Po, atë që… mbushi 3 vjet, domethënë, disa ditë më përpara, para 6 ditëve 3 vjeç, e kanë marrë ata nga data 12 Tetor 2015.
Psikologia 1 – Aleksandri ka nevoja emergjente të lëvizë nga ai ambient.
Psikologia 2– Ajo që konstatova në takimin e parë në këtë familje dhe lidhjen që kishte krijuar fëmija me gjyshërit, por edhe me babain, ishte një nga problematikat më të rëndësishme, që duhet sigurisht të merren masa menjëherë është fakti që në atë shtëpi kishte një baba dhe një mama. Fëmija i thërriste gjyshit, baba dhe nënës, gjyshes së vet, mami. Që do të thotë që këtu kemi një konfuzion rolesh dhe fakti që ai fëmijë rritet në një mjedis patologjik. Një problematikë tjetër ishte fakti që fëmija sigurisht edhe në… i ishte mohuar e drejta për të vendosur kontakte me babain, i cili është gjallë dhe kërkon që të kujdeset dhe ka një vendim të gjykatës dhe apelit për këtë dhe ka plotësisht të drejtën, po themi si prind që të prindërojë. E para, problem me personalitetin e tij. E dyta, kemi probleme të dukshme emocionale tek fëmija, ngarkesat e tij të herëpashershme ose shpërthimet e tij të herëpashershme, zëri i holluar i Aleksandros sigurisht, që…
Gazetari– Pse i holluar?
Psikologia 2 – Në psikologji ka një shpjegim të mundshëm që mund të lidhet me abuzimet, pra dhunën psikologjike, nuk mund të flas për dhunë fizike, përderisa nuk e konstatoj, por njëkohësisht edhe për faktin që ata mund ta trajtojnë vërtetë si vajzën e tyre. Ai është mashkull dhe trajtohet si vajzë.
Përpos raporteve të psikologeve, Gjykata e Apelit vendosi që Aleksandros të qëndrojë më gjyshërit, duke ia hequr kujdestarinë të atit.
Por si mund të sillet një fëmijë përballë të atit, të cilin nuk e njeh si të tillë? Kamera e fshehtë e emisionit “Stop” solli përballjen e Ajetit me të birin.
Babai – S’do të rrish me mu, po çfarë të kam bërë unë ty?
Fëmija– Ëhë…
Babai – Pse re? Unë jam i mirë, hajde të të përqafoj një çikë unë!
Gjyshja – Kush është ai?
Babai – Do të sjell Ergin, të takojë kushuriri.
Gjyshja – Është Ajet Patozi!
Fëmija – Epo mirë, do të përqafoj dhe pastaj do ikësh ti!
Babai – Do më përqafosh një herë dhe pastaj do iki?
Fëmija – Po!
Babai – Hajde! Fort? Hajde!
Gjyshja – Hë më!
Babai – Oh të keqen, oh të keqen! Ke guxhuli ti? Hajde të puth çikë prapë unë, do të ta sjell unë biçikletën ty. Hajde të të puth një çikë unë të keqen! Oh, të keqen!
Fëmija – Po ti ke fëmijë?
Babai – Kam fëmijë?
Fëmija – Po!
Babai – Kam!
Fëmija – Po kë ke?
Gjyshja – Po s’di gjë, ai është…
Babai – Kam… kë kam fëmijë unë?
Gjyshja – S’e di!
Fëmija – Mua!
Babai – Ty?
Fëmija – Ëhë!
Babai – Ë ere hajde, ti! Unë kush jam?
Fëmija – Nuk e di.
Babai – Po kur të kam ty fëmijë, unë kush jam?
Fëmija – Nuk e di!
Babai – Po unë jam babi, hajde, hajde të puth një çikë unë! Hajde rrimë këtu ne!
Fëmija – Jo!
Babai – Hajde mooo…!
Fëmija – Po do ikësh ti?
Babai – Po do iki sot unë, do vij prapë të takoj ty!
Fëmija – Epo, mirë!
Babai – Ça do ti, të të bjeri babi?
Fëmija – Nuk e di! Po, po, po kur ikja gjithmonë unë me autobus më zinte autobusi.
Babai – Të zinte autobuzi ty e?
Fëmija – Ëhë.
Babai – Oh, të keqen! Po pse të ze ty? Të ze si babi ty, se edhe babin e zinte autobusi.
Fëmija – Kur ishe i vogël ti?
Babai – Eee…
Fëmija – Po, po ti kishe nënë?
Ajet Patozi i bëri thirrje Gjykatës së Apelit, Presidentit dhe Ministrisë së Drejtësisë për rishqyrtimin e çështjes së kujdestarisë së djalit të tij 4-vjeçar, duke thënë: “Ai fëmijë nuk mund të jetojë me gjyshërit kur babai është gjallë dhe e kërkon me shumë dashuri!“.
Javën e kaluar emisioni “STOP” transmetoi denoncimin e Ajet Patozit, të cilit vjehrrit i kishin marrë djalin e vogël me dokumente të falsifikuara, pas vdekjes së të shoqes. Sot sjellim ndryshimin e certifikatës së lindjes për Aleksandrosin e vogël. Po kështu në një reagim zyrtar, Urdhëri i Psikologut sqaron se Brunketa Zoto, psikologia që hartoi raportin për vogëlushin, nuk rezulton anëtare e Urdhërit dhe nuk ka licencë profesionale. Rasti, thuhet në deklaratë, do t’i përcillet Komisionit të Gjykimit Disiplinor dhe do t’i nënshtrohet procedurave të hetimit profesional.
“Në Dhjetor të vitit 2013, dy muaj pas njohjes mora vesh që Ina kishte ngelur shtatzënë dhe vendosi që të vinte pranë familjes se shtatzënia e saj ishte pak e vështirë. Pas 3 – 4 muajsh morëm vesh që Ina ishte e sëmurë nga sëmundja e keqe. Shpresat ishin shumë të pakta sepse sëmundja kishte avancuar aq shumë sa kishte prekur disa pjesë të trupit. Fëmija lindi 7 muaj e gjysmë. Pasi lindi Aleksandro, Ina vazhdoi në ndikim më të shpejtë të kimioterapisë, por shpresat e saj sa vinin e ishin më të vogla. Ajo u nda nga jeta në Tetor të vitit 2015.”
I ati i Inës ka telefonuar të atin e Ajetit për t’i kërkuar një takim me nipin para se të shkonin në Greqi, por pas pranimit të këtij të fundit nisën edhe problemet mes familjeve. Ajeti së bashku me prindërit e tij tregojnë se prindërit e bashkëshortes i kërcënuan se nuk do t’ua kthenin më fëmijën, ndaj iu drejtuan proceseve ligjore.
“Ikni dhe te Zoti lart tha, nuk e merrni dot”, përsërit fjalët e vjehrrit, i cili më pas në polici ka kërkuar që të mund ta mbajnë nipin deri në të 40-at e së bijës. Ajeti nuk pranoi, por policia nuk kishte të drejtë ligjore për ta ndaluar, pasi duhej të posedonin vendim të prokurorisë. Por më pas prokuroria e referoi çështjen në Gjykatën e Rrethit Gjyqësor Berat.
Avokati i familjes Patozi shprehet se i janë drejtuar gjykatës me kërkesë – padinë për “kthimin e fëmijës dhe ushtrimin e përgjegjësisë prindërore”, por gjatë zhvillimit të seancave gjyqësore janë përballur me kundërpadinë e familjes së bashkëshortes së tij të ndjerë, të cilët kërkonin heqjen e përgjegjësisë prindërore të Ajetit dhe caktimin e gjyshes së të miturit si kujdestare ligjore.
Emisioni “STOP” komunikoi me psikologen Linda Hoxha, e cila tha se duke u bazuar në nenin 225 të Kodit të Familjes, nëse fëmija humb nënën biologjike, automatikisht përgjegjësia prindërore ushtrohet nga i ati. Ndërsa, përsa i përket heqjes së përgjegjësisë prindërore, ajo shprehet se ndodh kur prindi është i alkoolizuar, merret me lojëra fati, ndiqet nga ana mjekësore etj.
Gazetari i emisionit “STOP” i drejtohet Bashkisë Berat për të komunikuar me nëpunësen e Gjendjes Civile, Afërdita Gurin, se përse ka lëshuar një certifikatë për Aleksandron, i cili nuk e ka vendlindjen në Berat.
Gazetari – Zonjë! Të lutem! Do na e sqarosh pak, si e ke lëshuar certifikatën e fëmijës?
Afërdita Guri – Ka mundësi?
Gazetari – Të lutem! Na sqaro!
Afërdita Guri – Jam tek zyrat e pasaportave.
Gazetari – Po, mos hyr!
Afërdita Guri – Po kam punë tani, të lutem! Ik tani!
Gazetari – Do na sqarosh pak, të lutem?
Afërdita Guri – Drejtohu në gjykatë! Ik!
Gazetari – Ça të drejtohem në gjykatë unë?! Ti ke falsifikuar dokumentin.
Afërdita Guri – Ik tani!
Vlerësimi psikologjik nga psikologia Bruketa Zoto, i cili sipas saj ishte bazuar në bisedat klinike me fëmijën dhe intervistat e hapura me familjarët, vlerësimin e kushteve morale dhe materiale të familjeve, vëzhgimin e sjelljes dhe komunikimit jo verbal me të rriturit, ishte shkaku kryesor që gjyqtarja Llangozi vendosi që 3 – vjeçari të qëndronte në kujdestarinë e gjyshërve. Por te ky vlerësim mungon arsimi, numri i diplomës dhe Nipt-i i psikologes. Gazetari i emisionit “STOP” thotë së Bruketa Zoto nuk ka analizuar situatën social – ekonomike të të dyja palëve, por ka bërë vetëm një takim dhe ka dalë në këtë konkluzion.
Emisioni “STOP” i rikthehet këtij denoncimi për të treguar se certifikata e Aleksandros Patozit është ndryshuar, duke saktësuar vendlindjen e tij, që është Roskovec dhe se nëpunësja e Gjendjes Civile në Bashkinë Berat, Afërdita Guri është pushuar nga puna.
18 Tetor 2017
Afërdita Guri – Ajo certifikatë ka dalë nga zyra jonë dhe në bazë të ligjit të Gjendjes Civile, certifikatë mund të printojë përderisa është punonjëse. Ka ndonjë … ? Më thuaj! Ka ndonjë të dhënë?
Gazetari – Po si printon se thotë këtu: Gjendja Civile Berat.
Afërdita Guri – Po, po! Berat! Ja, ta shikojmë.
Gazetari – Po ka sjellë pasoja kjo për gjyqin. Më kupton?
Afërdita Guri – Kush tha?
Gazetari – Po, unë them pra se kam vendimin.
Sot, më datë 24 Tetor 2017, Drejtoria e Përgjithshme e Gjendjes Civile ka dhënë masën disiplinore “lirim nga detyra”, nëpunësit të shërbimit të Gjendjes Civile të Njësisë Administrative Nr. 3, Bashkia Berat, Znj. Afërdita Guri.
Ndërsa për sa i përket psikologes Brunketa Zoto, që bëri vlerësimin psikologjik të 3 – vjeçarit dhe familjarëve, vlerësim i cili bëri që kujdestarinë ta fitonte gjyshja nga ana e së ëmës, rezulton se nuk është anëtare e Urdhrit të Psikologëve dhe se nuk është e pajisur me licensën profesionale. Ndaj ky rast do t’i përcillet Komisionit të Gjykimit Disiplinor nga Presidentja e Urdhrit, Dr. Valbona Treska dhe do t’i nënshtrohet procedurave të hetimit profesional.
Aleksandrosi humbi nënën, por nuk mund të humbë dhe të atin, vetëm e vetëm se gjyshërit e tij dëshirojnë të qëndrojë me ta, duke falsifikuar madje dhe dokumentet.
Burimi / tvklan.al
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
