Shpesh thuhet se njerëzit duan partnerë afatgjatë që janë të sjellshëm, të besueshëm dhe emocionalisht mbështetës. Megjithatë, përkundër këtyre qëllimeve, shumë njerëz vazhdojnë të vënë theks të madh tek pamja fizike, edhe kur janë në kërkim të marrëdhënieve të qëndrueshme.
Një studim i ri i publikuar në revistën Journal of Experimental Social Psychology hedh dritë mbi këtë kontradiktë duke identifikuar një shtysë të rëndësishme psikologjike që qëndron pas këtyre preferencave: dëshira seksuale.
Studiuesit zbuluan se njerëzit kishin më shumë gjasa të vlerësonin atraktivitetin fizik si prioritet në një partner afatgjatë kur përjetonin dëshirë seksuale të shtuar. Kjo lidhje ishte e vlefshme për të dyja gjinitë dhe mbeti e qëndrueshme pavarësisht nga dallimet individuale. Ajo dukej të ndikohej si nga niveli i përgjithshëm i dëshirës seksuale i një personi, ashtu edhe nga aktivizimi i kësaj dëshire në moment.
Këto gjetje shtojnë një dimension të ri në dekada kërkimesh në psikologjinë evolutive, të cilat prej kohësh sugjerojnë se njerëzit preferojnë partnerë të bukur sepse bukuria lidhet me cilësi si pjelloria dhe përshtatshmëria gjenetike. Por ndërsa ato teori shpjegojnë avantazhet afatgjata të përzgjedhjes së partnerëve tërheqës, rrallëherë sqarojnë se çfarë i nxit njerëzit në moment të kërkojnë këto cilësi. Ky studim i ri plotëson atë boshllëk duke treguar se si ndryshimet e përkohshme në dëshirën seksuale mund të ndikojnë tek prioritetet romantike të një personi.
Studimi u udhëhoq nga psikologia Sierra D. Peters dhe kolegët e saj në Rhodes College. Studiuesit donin të tejkalonin shpjegimet e zakonshme mbi preferencat ndaj partnerëve, të cilat zakonisht bazohen në dallime gjinore të përgjithshme ose në prirje kulturore. Qëllimi i tyre ishte të eksploronin motivimet momentale që formësojnë mënyrën se si njerëzit vlerësojnë partnerët potencialë – sidomos në kontekstin e marrëdhënieve afatgjata.
“Unë gjithmonë kam qenë e interesuar për cilësitë që njerëzit kërkojnë tek partnerët romantikë dhe pse,” shpjegon Peters, profesoreshë e psikologjisë. “Ka shumë kërkime që tregojnë se njerëzit (veçanërisht burrat) preferojnë partnerë afatgjatë tërheqës fizikisht, por pyetja pse ndodh kjo nuk është studiuar aq gjerësisht. Në nivelin evolucionar, atraktiviteti sinjalizon cilësi të dëshirueshme si shëndeti, pjelloria dhe potenciali riprodhues.”
“Megjithatë,” shton ajo, “unë isha e interesuar për atë që ndodh në nivelin më të afërt emocional dhe motivues – çfarë ndjejnë njerëzit që i shtyn t’i zgjedhin partnerët tërheqës fizikisht.”
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
