Kanceri i gjirit është vrasësi numër një i grave, e për këtë janë ndërmarrë fushata të shumta sensibilizuese që gratë të kryejnë kontrolle të shpeshta për ta kapur sëmundjen në fazat fillestare të saj.
Në 2016-n lloji më i përhapur i kancerit në Shqipëri ishte kanceri i gjirit. Sipas të dhënave të portalit OurWorld In Data, që përpunon informacionin e Organizatës Botërore të Shëndetësisë, 0.08% e popullsisë vuante nga ky lloj kanceri në 2016-n. Ky lloj kanceri përhapet kryesisht tek gratë.
Edhe pse është një ndër llojet më të përhapura të kancerit, të dhënat e tërthorta tregojnë se pjesa më e madhe arrijnë që ta luftojnë këtë lloj kanceri.
Për fat të mirë, numri i vdekjeve nga kanceri i gjirit në 2016-n ishte më i ulëti në rajon, ku për 100 mijë banorë, 6.5 kishin vdekur nga kjo kategori.
Në Bosnje, numri i grave që vdiqën nga kjo sëmundje ishte 10.2 për 100 mijë banorë, ndërsa në Malin e Zi, 9.3. Në Maqedoni vdiqën dyfish më shumë gra, prej kancerit të gjirit në krahasim me Shqipërinë, ndërsa në Serbi 14.1 për 100 mijë banorë.
Lloji i dytë më i përhapur ishte kanceri i prostatës. Sipas të dhënave 0.6% e popullsisë vuante nga ky lloj. Nga të dhënat e përpunuara dhe krahasuar me të gjithë rajonin, ky lloj kanceri është më i përhapuri në Shqipëri. Për 2016-n numri i vdekjeve në 100 mijë banorë ishte 9.3. Numri i vdekjeve në Maqedoni ishte nëntë, ndërsa më të ulëtin e kishte Bosnja me 7.8 vdekje.
Më pas kanceri i tretë më i përhapur në popullatë është kanceri i zorrës së trashë. Rreth 0.03% e popullsisë vunte nga ky lloj kanceri në 2016-n.
Më pas renditen kanceri i aparatit të frymëmarrjes 0.031, tumoret në veshka 0.02, kanceri i stomakut 0.01 etj.
Rritja e përqindjes së popullsisë që vuan nga kanceri ul në mënyrë drastike produktivitetin e popullatës.
Burimi / http://www.balkanweb.com
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
