Lëngjet e frutave dhe perimeve siç është ai me portokall, panxhar dhe karota, janë të famshëm për vlerat ushqyese që përmbajnë. Këto lëngje zakonisht përfitohen nga shtrydhja ose copëzimi i tulit të tyre. Lëngu ka një shije të freskët dhe ka përmbajtje të lartë fibre.
Koha e përgatitjes
10 minuta
Përbërësit për katër persona:
- 1 panxhar i qëruar
- 500 gramë karota të qëruara
- 700 gramë portokalle të qëruara
Përgatitja:
Prini panxharin, karotat dhe portokallet në copa të mëdha. Kur të pastroni dhe prisni panxharin ju këshillojmë të përdorni dorashka kuzhine, që të evitoni njollat që lë lëngu i tij. Të gjitha copëzat hidhini në shtrydhëse dhe për 2-3 minuta do të keni gati një lëng shumë të shëndetshëm dhe të shijshëm.
Vlerat e këtij lëngu
Përveç rritjes së imunitetit, lëngu i panxharit, karotë dhe portokallit ndihmon dhe në pastrimin e mëlçisë nga toksinat.
Panxhari është i njohur për aftësitë e tij për uljen e tensionit të lartë si dhe për parandalimin e ngërçit muskulor. Ai është një burim për kalium, magnez, hekur, vitamina të ndryshme A, B6, C, antioksidantë dhe fibra.
Portokallet nga ana tjetër, janë të pasura me antioksidant dhe vitaminë C. Sigurisht përmes konsumimit të tyre përfitojmë dhe kalcium, bakër, dhe vitaminën B.
Të fundit, por jo nga rëndësia, karotat ulin rrezikun e sëmundjeve kardio-vaskulare. Ato kanë nivele të lartë të vitaminës A dhe K që ndihmojnë qarkullimin e gjakut. Karotat quhen dhe super perimet për shëndetin e syve.
Ky lëng jo vetëm është plot surpriza në shije, por vjen dhe si një paketë për sistemin imunitar. Mund të konsumohet nga të rriturit dhe fëmijët gjatë vaktit të mëngjesit.
Një tjetër lëng shumë i shëndetshëm është ai me panxhar, mollë dhe karota. Më poshtë gjeni edhe recetën e përgatitjes:
- Panxhar, mollë, karotë
- 1 panxhar i madh i qëruar
- 2 karota të mëdha
- 1 mollë jeshile
Priteni panxharin dhe më pas hidheni në shtrydhësen e frutave së bashku me të gjithë përbërësit e tjerë. Hidheni lëngun në gotë dhe shijojeni plotësisht duke përfituar një dozë ideale ushqyesish për shëndetin tuaj. Ky lëng ofron shumë energji, lufton lodhjen dhe e ndihmon organizmin të furnizohet me oksigjen. Molla është një tjetër frut që përshtatet mirë me panxharin. Ajo përmban antioksidantë dhe lufton inflamacionin.
Burimi / AgroWeb.org
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
