Prishja e gjumit të fëmijës ka një shumësi arsyesh që në pamje duken të parëndësishme, si p.sh. fëmija duhet të flejë gjithnjë në të njëjtën dhomë, (deri në moshën 2 vjeç, periudhë për të cilën presupozohet se fëmija ushqehet me gji, mund të rrijë në dhomë të prindërve por në krevat me vete, më pas të shkojë në dhomën e tij).
Momentet kyçe në jetën e fëmijës si ecja, të shkuarit në çerdhe apo në kopsht, sëmundja, apo vajtja e nënës në punë janë faktorë të rëndësishëm që tek fëmija shkaktojnë tronditje dhe për pasojë edhe çrregullim të gjumit. Kur nëna shkon në punë fëmijës i pakësohen orët e qëndrimit me të dhe kjo tek fëmija shkakton pasiguri.
Gjithashtu dhe mosprania e babait shkakton të njëjtin shqetësim, si ai që shkakton mungesa e nënës. Për të kompensuar mungesën ditore për arsye të punës, prindërit duhet të ndërtojnë një rutinë ku me qetësi të riorganizojnë rutinën dhe të ulin shkallën e pasigurisë dhe të shqetësimit tek fëmija. Kjo mund të realizohet nëpërmjet leximit të librit para gjumit, të tregimit të përrallave apo të këndojnë së bashku dhe kështu fëmija ndërton rutinën e re dhe shmang frikën dhe dyshimet se përse prindërit largohen prej tij dhe gradualisht mund të rregullohet edhe gjumi.
Më poshtë po numërojnë faktorë që gjenerojnë shqetësime në gjumin e fëmijës.
- kur dalin dhëmbët
- kur fillon të ecë
- kur shkon në çerdhe dhe kopsht
- kur vjen një motër apo vëlla tjetër,
- ushqyerja e keqe në sasi dhe cilësi sidomos përpara se të flejë
- sëmundje
- problemet në familje
- ardhja e njerëzve të tjerë në shtëpi
- prishja e rutinës
Kohët e fundit insistohet që mjetet elektronike apo mjetet (pa tela)të mbahen larg vendit ku fle fëmija, pasi ka fëmijë që janë shumë të ndjeshëm ndaj valëve elektromagnetike.
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
