Shumica prej nesh dëshirojmë të kemi sukses në punë, në marrëdhënie personale apo në mirëqenie të përgjithshme. Ndonjëherë ëndërrojmë më shumë kohë për veten, herë të tjera dëshirojmë shëndet më të mirë ose një qëllim më të qartë në jetë. Një nga mënyrat më të njohura për ta arritur këtë është “Mëngjesi i Mrekullisë” një metodë e thjeshtë, por me ndikim të madh.
Çfarë është “Mëngjesi i Mrekullisë”?
Metoda “Mëngjesi i Mrekullisë” është krijuar nga autori amerikan Hal Elrod, pas një ngjarjeje që i ndryshoi jetën. Ai mbijetoi nga një aksident i rëndë ku zemra i ndaloi për gjashtë minuta dhe qëndroi në koma për gjashtë ditë. Pavarësisht se mjekët mendonin se nuk do të ecte më, Elrod u rikuperua dhe vendosi t’i kushtohej zhvillimit personal dhe ndihmës për të tjerët.
Sipas tij, çelësi i suksesit qëndron në një rutinë të strukturuar mëngjesi. Për këtë ai krijoi metodën SAVERS, një akronim për gjashtë aktivitete të thjeshta që mund të praktikohen çdo ditë në mëngjes për të përmirësuar jetën.
Metoda SAVERS – 6 hapat e mëngjesit të mrekullueshëm
1.Heshtja
Filloni ditën me qetësi. Kaloni pesë minuta në heshtje totale, jashtë shtratit. Mund të meditoni, të bëni frymëmarrje të thellë apo të reflektoni mbi qëllimet tuaja. Kjo ju ndihmon të ulni nivelin e stresit dhe të krijoni një gjendje të qetë mendore.
2.Pohimi
Përsëritni fraza pozitive për veten. Pohimet janë deklarata që ndihmojnë në ndërtimin e vetëbesimit dhe përqendrimit. Shembull: “Unë jam i aftë të përballoj çdo sfidë që më del përpara.” Përsëritja e këtyre mendimeve e orienton mendjen drejt suksesit.
3.Vizualizimi
Imagjinoni veten duke jetuar jetën që dëshironi. Mendoni se çfarë keni arritur, si ndiheni dhe çfarë hapash keni ndërmarrë për të arritur qëllimet tuaja. Krijoni imazhe të qarta dhe të besueshme që ju motivojnë.
4.Ushtrimet fizike
Edhe pak minuta aktivitet fizik çdo mëngjes ka përfitime të jashtëzakonshme. Mund të bëni yoga, stretching, apo një rutinë të shkurtër ushtrimesh në shtëpi. Kjo rrit energjinë, përqendrimin dhe përmirëson gjendjen emocionale.
5.Leximi
Lexoni rreth 10 faqe çdo mëngjes. Zgjidhni materiale që ju frymëzojnë dhe ju ndihmojnë të rriteni si person. Nëse e bëni çdo ditë, në fund të vitit do të keni lexuar me dhjetëra libra që mund t’ju ndryshojnë jetën.
6.Shkrimi
Kaloni pak kohë duke shkruar në një ditar. Mund të regjistroni mendime, ndjenja, ide apo përparimin tuaj. Ky zakon ndihmon në vetëdijesimin emocional dhe qartësimin e qëllimeve.
Pse funksionon kjo metodë?
Ideja kryesore është se mënyra si e filloni mëngjesin ndikon drejtpërdrejt në ecurinë e gjithë ditës suaj. Në vend që të zgjoheni me stres apo të kontrolloni telefonin, kjo rutinë ju ndihmon të nisni ditën me qartësi, energji dhe fokus. Elrod rekomandon të zgjoheni vetëm një orë më herët për të përfshirë të gjashtë aktivitetet.
Si të filloni?
Nuk keni pse t’i bëni të gjitha në mënyrë perfekte që në ditën e parë. Filloni me një ose dy aktivitete që ju duken më të lehta apo më tërheqëse, dhe gradualisht shtoni të tjerat. E rëndësishme është të ndërmerrni hapin e parë.
Cili nga aktivitetet ju tërheq më shumë për ta nisur që nesër në mëngjes?
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
