Mjaftojnë 90 sekonda që gjendja e humorit të keq të kalojë. Nuk është një lojë sociologjie, por një terapi e vogël dhe efikase e sugjeruar nga filozofja Elsa Punset, eksperte në menaxhimin e emocioneve, përmes një testi shumë të dobishëm.
Si ta kalosh këtë gjendje?
Para se ta aplikosh këtë sugjerim të Punset, është mirë të përcaktoni kategorinë e humorit të keq. Të mos e ngatërroni për shembull me depresionin, i cili ka nevojë për një terapi specifike.
Humori i keq është një gjendje shpirtërore kalimtare, ndonjëherë e shkaktuar nga gjëra shumë banale: një përgjigje e vrazhdë në punë, kapriçot e fëmijëve, një thashethem që keni dëgjuar për veten, apo një mungesë vëmendjeje nga një person që e doni shumë.
Sidoqoftë, kjo gjendje, nëse përsëritet shpesh, mund të sjellë pasoja negative. Mund të mos pëlqeni veten, të mos ndiheni rehat, të lodheni nga kontaktet me të tjerët, të bëheni të ndjeshëm. Të gjitha mundësitë ju çojnë në një rrugë qorre.
Si të eliminohet kjo gjendje sa më shpejt?
Përse 90 sekonda? Sepse është koha gjatë së cilës, normalisht na pushton një emocion negativ dhe trupi ka nevojë pikërisht për një minutë e gjysmë përpara se të prodhojë hormonin e stresit dhe më pas të kthehet në gjendjen normale.
Në këto 90 sekonda duhet të përqendroheni, pa u menduar, për të mirëpritur pikërisht emocionin negativ, gjendjen shpirtërore të errët. Duhet ta pranojmë dhe të mos e hedhim poshtë këtë ndjenjë. Më pas, sapo të fillojë të ulet intensiteti, mjafton të mendojmë për gjërat e bukura që na kanë ndodhur së fundi dhe në pak minuta, kimia negative që është gjeneruar, fshihet. Gjendja e humorit të keq kaloi. Gjithçka vetëm në 90 sekonda.
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
