Po ndiheni të lodhur shpirtërisht? Ju mungon motivimi apo pozitiviteti? Atëherë ndiqni këto këshilla të thjeshta për të rifituar energjinë dhe mirëqenien tuaj.
Ka ditë që ndihen bosh. Gjithçka duket e zbehtë, e ftohtë, dhe asgjë nuk sjell gëzim. Në ato momente kur çdo gjë duket më e vështirë, ajo që ju nevojitet më shumë është të gjeni mënyra për të ngritur shpirtin tuaj. Ndonjëherë, mjafton një pushim i shkurtër dhe një bisedë e sinqertë me veten.
Është e rëndësishme të kuptoni se është plotësisht normale të mos ndiheni gjithmonë të motivuar apo të lumtur. Gjendjet emocionale luhaten, dhe ditët pa energji janë pjesë e jetës. Vetëdijesimi për ndjenjat tuaja dhe zbatimi i disa strategjive të thjeshta mund të bëjë ndryshimin. Ja disa mënyra të shpejta për të përmirësuar humorin tuaj:
1.Dilni për një shëtitje në natyrë
Kur ndiheni të tensionuar apo të mbytur nga stresi, dilni në ajër të pastër. Ecjet në mal, pyll, buzë detit apo edhe në një park mund të sjellin qetësi të menjëhershme.
Pse funksionon?
Kontakti me natyrën rrit nivelin e endorfinës dhe serotoninës, që ndikojnë drejtpërdrejt në përmirësimin e humorit. Truri qetësohet dhe merr një perspektivë më të qartë e të relaksuar.
2.Bëni diçka krijuese
Përfshihuni në një aktivitet artistik: vizatoni, shkruani, gatuani, punoni në kopsht apo krijoni diçka me duart tuaja. Krijimtaria ju ndihmon të hyni në një gjendje “rrjedhjeje” ku stresi largohet dhe mendja qetësohet.
Pse funksionon?
Artet ndihmojnë në balancimin emocional dhe në reduktimin e stresit. Edhe nëse nuk jeni “artist”, akti i krijimit vetvetiu është terapeutik.
3.Telefononi një mik të mirë
Kur ndiheni të mërzitur, mos u izoloni. Flisni me dikë që ju kupton dhe ju mbështet pa gjykim. Ndonjëherë, vetëm dëgjimi dhe ndarja e ndjenjave është gjithçka që na duhet.
Pse funksionon?
Ndërlidhjet sociale janë esenciale për mirëqenien mendore. Bisedat e sinqerta me njerëzit e afërt ndihmojnë në çlirimin e stresit dhe në ndërtimin e perspektivave të reja.
4.Mbani një ditar mirënjohjeje
Blini një fletore të bukur dhe përdoreni për të shkruar çdo ditë gjërat për të cilat ndiheni mirënjohës: familja, miqtë, shëndeti, një kujtim i bukur, një ëndërr për të ardhmen.
Pse funksionon?
Mirënjohja ju ndihmon të fokusoheni në aspektet pozitive të jetës dhe të kujtoni gjithçka që keni, në vend që të përqendroheni tek ajo që ju mungon.
5.Praktikoni 20 minuta “mindfulness”
Meditimi i vëmendjes së plotë (mindfulness) është një mënyrë efektive për të menaxhuar emocionet dhe për të rritur qetësinë shpirtërore. Mund ta filloni me ushtrime të thjeshta vëzhgimi të frymëmarrjes ose ushtrime vëmendjeje në ndjesitë trupore.
Pse funksionon?
Mindfulness ndihmon në rregullimin emocional dhe redukton simptomat e ankthit dhe stresit. Është gjithashtu pjesë e shumë terapive bashkëkohore psikologjike.
6.Jepni (dhe merrni) përqafime
Mos e nënvlerësoni fuqinë e një përqafimi të ngrohtë. Përqafoni familjarët, partnerin, miqtë, apo edhe kafshën tuaj shtëpiake. Kjo afërsi fizike sjell qetësi dhe ndjesi sigurie.
Pse funksionon?
Përqafimet rrisin hormonin e “ndjesisë së mirë” – oksitocinën – dhe ndihmojnë në uljen e stresit dhe përmirësimin e gjendjes emocionale.
Po nëse këto këshilla nuk funksionojnë?
Nëse ndiheni të pashpresë për disa javë me radhë, nuk është turp të kërkoni ndihmë profesionale. Shpesh ne injorojmë ndjenjat tona, por emocionet e papërpunuara mund të çojnë në ankth të vazhdueshëm apo depresion. Terapia psikologjike ofron mjete efektive për të menaxhuar këto gjendje.
Kujdesuni për veten çdo ditë
Në përfundim, edhe pse është normale të kemi ditë të vështira, është e rëndësishme të mos lejojmë që këto gjendje të bëhen të përhershme. Praktikoni vetëkujdesin çdo ditë – përmes shëtitjeve, artit, meditimit dhe përqafimeve. Sepse lumturia, në thelb, është të ndihesh mirë me veten – dhe kjo është diçka që mund ta ushtroni që sot.
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
